ახალციხეში ადმინისტრაციული რესურსის შესაძლო გამოყენების ფაქტს ცესკო სწავლობს

უწყებათაშორისმა კომისიამ ახალციხეში 6 აგვისტოს ადმინისტრაციული რესურსის შესაძლო გამოყენების ფაქტთან დაკავშირებით, „სამხრეთის კარიბჭეს“ მიმართვის საფუძველზე, ცენტრალაურ საარჩევნო კომისიას აცნობა. ცესკომ კი წერილი №37–ე ახალციხის საოლქო საარჩევნო კომისიას დააწერა.

„ადმინისტრაციული რესურსის გამოყენებასთან დაკავშირებით ადმინისტრაციული სამართალდარღვევის ოქმს ადგენს ცესკო და უგზავნის სასამართლოს. შემდეგ სასამართლო წყვეტს ოქმი დატოვოს ძალაში თუ გააუქმოს. ანუ ფაქტის დადგენა, ჰქონდა თუ არა ადგილი ადმინისტრაციული რესურსის გამოყენებას, ცესკოს კომპეტენციაა“, – აცხადებს უწყებათაშორისი კომისიის სამდივნოს წევრი გიგა დაიაური და ამატებს, რომ დარღვევისთვის ჯარიმის საკითხს სასამართლო წყვეტს.

როგორც №37–ე ახალციხის საოლქო საარჩევნო კომისიის თავმჯდომარე თეა გავაშელი აცხადებს, საქმე წარმოებაშია და იგი შესაბამის დასკვნას ცენტრალურ საარჩევნო კომისიას გადაუგზავნის: „წერილი, როგორც მახსვოს, 9 აგვისტოს გამოგვიგზავნეს და შესწავლისთვის ვადა ერთი თვე გვაქვს“.

დარღვევის დადგენის შემთხვევაში, ახალციხის თვიმმართველობა საარჩევნო კოდექსის 79–ე მუხლის შესაბამისად 2 000 ლარით დაჯარიმდება.

შეგახსენებთ, რომ 6 აგვისტოს ახალციხის ადმინისტრაციულ შენობაში „ქართული ოცნების“ აქტივისტებთან შეხვედრა გაიმართა. როგორც „სამხრეთის კარიბჭემ“ დააფიქსირა, აღნიშნულ შეხვედრაზე იმყოფებოდნენ, როგორც ახალციხის მერიის, ისე გამგეობის პირველი პირები და სხვა თანამშრომლები. ერთ–ერთი აქტივისტის განცხადებით, შეკრება მეორე დღეს, რეგიონში „ქართული ოცნების“ თავმჯდომარის, გიორგი კვირიკაშვილის ჩამოსვლასთან დაკავშირებულ საორგანიზაციო საკითხებს ეხებოდა. აღნიშნულის შესახებ რედაქციამ უწყებათაშორის კომისიას აცნობა.

[თამუნა უჩიძე, ახალციხე]