გამოიყენა თუ არა ‘ოცნების’ კანდიდატმა ადმინისტრაციული რესურსი – ფაქტს საოლქო კომისია სწავლობს

ცენტრალურმა საარჩევნო კომისიამ შემთხვევის შესწავლა, უწყებათაშორისი კომისიის მიმართვის საფუძველზე დაიწყო. უწყებათაშორისმა კი ახალციხეში, 14 აგვისტოს, ადმინისტრაციული რესურსის შესაძლო გამოყენების ფაქტის შესწავლა „სამხრეთის კარიბჭეს“ მიმართვის შემდეგ დაიწყო.

ცესკომ ფაქტის მოკვლევა ახალციხის საოლქო კომისიას დაავალა.

№37–ე ახალციხის საოლქო საარჩევნო კომისიის თავმჯდომარე თეა გავაშელს განცხადებით, ფაქტთან დაკავშირებით მოკვლევა დაწყებულია: „სხვადასხვა უწყებებიდან პასუხს ველოდები“

შეგახსენებთ, რომ 14 აგვისტოს, ახალციხეში, ახალციხის მერიამ აფხაზეთის ომის დაწყების 24 წლისთავთან დაკავშირებით გამართა ღონისძიება, რომელსაც ახალციხის ყოფილი მერი, ამჟამად, ახალციხე–ადიგენის საარჩევნო ოლქში "ქართული ოცნების" მაჟორიტარობის კანდიდატი გიორგი კოპაძე ესწრებოდა. კოპაძე ღონისძიებაზე სიტყვით გამოვიდა. იურისტები განმარტავენ, რომ კანდიდატის ბიუჯეტიდან დაფინანსებულ ღონისძიებაზე დასწრება ადმინისტრაციული რესურსის გამოყენების ნიშნებს შეიცავდა.

[ვარლამ წიკლაური, ახალციხე]