პილიტიკური ნიშნით შესაძლო გათავისუფლების ფაქტი ნინოწმინდის პოლიციაში

ნინოწმინის რაიონული სამმართველოს უბნის ინსპექტორ-გამომძიებელმა მგერ გომციანმა სამსახური პირადი განცხადების საფუძველზე, 2 აგვისტოს დატოვა . ეს მას შემდეგ მოხდა, რაც ახალქალაქში, „ნაციონალების“ შეკრებაზე, გომციანის დედამ ლიდა ანტანოსიანმა პარტიის აქტივისტები შეკრიბა.

„ნაციანლების“ აქტივისტი ვარ და ამ შეხვედრის ორგანიზებას რომ ვაკეთებდი, ჩემმა შვილმა დამირეკა, დედა უკან წამოდიო“, – ამბობს ანტანოსიანი.

მისი თქმით, ეს არ იყო პირველი შემთხვევა, როცა მას შვილმა პარტიული საქმიანობისთვის თავის დანებება სთხოვა.

„ჩემ შვილს უთხრეს, დედაშენი „ნაციონალებისთვის“ მუშაობს და ასე არ შეიძლებაო. კონკრეტულად ვინ უთხრა არ ვიცი, მაგრამ თქვა სამსახურში ამის გამო მეჩხუბებიან და მეუბნებიან რომ გამომიშვებენო“, – ამბობს ლიდა ანტანოსიანი.

მისი თქმით, მისი შვილი აიძულეს პოლიციაში განცხადება სამსახურიდან გათავისუფლებაზე თავად დაეწერა: „უთხრეს დაწერე და წადიო. შეეშინდა რამე სხვა მიზეზით არ გამოეშვათ თვითონ, ამიტომ დაწერა განცხადება და წამოვიდა“.

„სამხრეთის კარიბჭე“ მგერ გომციანს ვერ დაუკავშირდა, როგორც მის ოჯახში განაცხადეს ახლა ის სომხეთში იმყოფება. ლიდა ანტანოსიანი კი აცხადებს, რომ მას შემდეგ რაც მის შვილს სამსახური დაატოვებინეს ოჯახი შემოსავლის გარეშე დარჩა: „25 წლისაა ჩემი შვილი. სახლში არავინ ვმუშაობთ“.

„საერთაშორისო გამჭვირვალობა – საქართველოსა“ და „ახალგაზრდა იურისტთა ასოციაციში“ აცხადებენ, რომ საქმე წინასაარჩევნოდ ძალისმიერი რესურსის შესაძლო გამოყენებასთან გვაქვს.

„აქ მრავალმხრივ დარღვევასთან გვაქვს საქმე. თუ განცხადება იძულებით დააწერინეს, ეს სისხლის სამართლის დანაშაულია“, – აცხადებს „საერთაშორისო გამჭვირვალობა – საქართველოს“ იურისტი გიგი ჩიხლაძე.

საქართველოს შინაგან საქმეთა სამინისტროში მგერ გომციანის სამსახურიდან წასვლის ფაქტს ადასტურებენ. საზოგადოებასთან ურთიერთობის სამსახურში აცხადებენ, რომ გომციანმა პოზიცია პირადი განცხადების საფუძველზე დატოვა და იგი არავის გაუთავისუფლებია.

გაათავისუფლეს თუ არა გომციანი პოლიციიდან ამ ფაქტის მოკვლევით საია დაინტერესდება.

„აქ შესაძლოა საქმე ადმინისტრაციული რესურსის ძალისმიერ გამოყენებასთან გვქონდეს“, – ამბობს საიას საარჩევნო პროექტების
კოორდინატორი ირმა პავლიაშვილი.

[თამუნა უჩიძე, ნინოწმინდა]