მინდია ჯანელიძე ბორჯომში სტიქიის ზონებს ათვალიერებს

ამ წუთებში კრიზისების მართვის საბჭოს ხელმძღვანელი მინდია ჯანელიძე ლიკანში იმ ადგილებს ათვალიერებს, რომელბიც სტიქიამ განსაკუთრებით დააზიანა.

„აქედან პლატოს ტერიტორიაზე მივდივართ“, – აცხადებენ ბორჯომის მუნიციპალიტეტის გამგეობის საზოგადოებასთან ურთიერთობის სამსახურში.

ჯანელიძესთან ერთად ლიკანში სამცხე–ჯავახეთის გუბერნატორი აკაკი მაჭუტაძე, ასევე ადგილობრივი თვითმმართველობის წარმომადგენლები იმყოფებიან.

ბორჯომში რეგიონული განვითარებისა და ინფრასტრუქტრურის მინისტრსაც ელოდებიან.

შეგახსენებთ, დღეს საღამოს, ბორჯომში, რამდენიმე საათის განმავლობაში გადაუღებლად წვიმდა, იყო სეტყაც. უხვი ნალექის გამო, დაიტბორა ბორჯომის ქუჩები, გზებზე შეიქმნა საცობები, წყალი შევარდა პირველ სართულებზე ადგილობრივ მცხოვრებლებთან და კერძო ობიექტებში.

ე.წ. გოგირდის აბანოებში 20–მდე ადამიანი ჩარჩა, რომლებიც სამაშველო სამსახურმა გამოიყვანა.

სამცხე–ჯავახეთის გუბერნატორის განცხადებით, ბორჯომის პარკი სტიქიამ მთლიანად გაანადგურა.

ძლიერმა წვიმამ და ქარმა წაღვერის გზაზე ხეები მოტეხა, რის გამოც მოძრაობა შეფერხდა. ძლიერმა ნიაღვარმა და მოტეხილმა ხეებმა თბილისი–ბორჯომის ცენტრალურ მაგისტრალიც ჩაკეტა, სადაც ასევე შეფერხებული იყო მოძრაობა ნახევარი საათის განმავლობაში.

ქარიშხალი და სეტყვა იყო ცემშიც.

[თამუნა უჩიძე, ბორჯომი]