კრიზისების მართვის საბჭოს განცხადება ბორჯომის სტიქიის შესახებ

ძლიერი წვიმისა და სეტყვის შედეგად ბორჯომში შექმნილ ვითარებასთან დაკავშირებით, პრემიერ მინისტრის დავალებით, ადგილზე მობილიზებულია ყველა შესაბამისი სამსახური.

ბორჯომში, სტიქიის შედეგად საცხოვრებელი სახლები და კომერციული ობიექტები დაიტბორა. მოვარდნილმა ღვარცოფულმა ნაკადმა რამდენიმე ქუჩაზე მოძრაობა შეაფერხა. დაზიანებულია ასფალტის საფარი. ძლიერმა ქარმა ასევე დააზიანა ელექტროგადამცემი ხაზები, რის გამოც ელექტროენერგიის გარეშე დარჩა რამდენიმე ათასი აბონენტი.

როგორც განცხადებაშია აღნიშნული, საქართველოს პრემიერ–მინისტრის დავალებით, ადგილზე მობილიზებულია ყველა შესაბამისი სამსახური.
სიტუაციის კონტროლის და კოორდინაციის მიზნით, ბორჯომში გაემგზავრნენ სახელმწიფო უსაფრთხოებისა და კრიზისების მართვის საბჭოს მდივანი მინდია ჯანელიძე და საქართველოს რეგიონული განვითარებისა და ინფრასტრუქტურის მინისტრი ნოდარ ჯავახიშვილი. ადგილზე ასევე მობილიზებულია საპარტულო პოლიციის და საგანგებო სიტუაციების მართვის სააგენტოს დამატებითი ეკიპაჟები.

განცხადების თანახმად, ამ დროისთვის საავტომობილო გზებზე მოძრაობა აღდგენილია, დაზიანებულ ქუჩებზე მიმდინარეობს წყლის ამოტუმბვითი და გაწმენდითი სამუშაოები. მოსახლეობისთვის ელექტროენერგიის აღდგენა ეტაპობრივად მოხდება.

"სამაშველო ოპერაციის შედეგად 40-მდე ადამიანის ევაკუაცია განხორციელდა. ძლიერი ქარის შედეგად მოგლეჯილი ხე დაეცა ავტომანქანას, რომელშიც ერთი ქალბატონი იმყოფებოდა. დაზარალებული მსუბუქი დაზიანებებით საავადმყოფოშია გადაყვანილი", – ვკითხულობთ განცხადებაში.

განცხადების მიხედვით, მოსახლეობის დასახმარებლად გასულია შსს-ს სახანძრო-სამაშველო ჯგუფები. მაშველებმა ოპერატიული რეაგირება მოახდინეს 170-ზე მეტ შეტყობინებაზე, რომლებიც ყველა რთულ უბანზე უწყვეტ რეჟიმში მუშაობენ. დამატებითი სამაშველო ჯგუფები მობილიზებულია ახალციხიდანაც. სამაშველო ოპერაციებში ჩართული არიან საპატრულო პოლიციის დეპარტამენტისა და კრიმინალური პოლიციის თანამშრომლები. ავტომანქანების გადაადგილებას საპატრულო ეკიპაჟები არეგულირებენ.

ამ დროისთვის მეტეოროლოგიური პირობები ქ. ბორჯომში სტაბილურია.

შეგახსენებთ, დღეს საღამოს, ბორჯომში, რამდენიმე საათის განმავლობაში გადაუღებლად წვიმდა, იყო სეტყაც. უხვი ნალექის გამო, დაიტბორა ბორჯომის ქუჩები, გზებზე შეიქმნა საცობები, წყალი შევარდა პირველ სართულებზე ადგილობრივ მცხოვრებლებთან და კერძო ობიექტებში.

[ნინო ნარიმანიშვილი, ბორჯომი]