სამცხე–ჯავახეთის გუბერნატორი: ‘ბორჯომის პარკი განადგურებულია’

სამცხე–ჯავახეთის გუბერნატორი აკაკი მაჭუტაძე ამ წუთებში ბორჯომიდან წაღვერის მიმართულებით მიდის. მისი თქმით, მუნიციპალიტეტის მასშტაბით სტიქიის გამო არავინ დაშავებულა, უვნებლად გადაარჩინეს გოგირდის აბანოებში ჩარჩენილი მოქალაქეები, თუმცა ინფრასტრუქტურა მნშვნელოვნად დაზიანდა.

„განადგურებულია ბორჯომის პარკი, ლამპიონებითა და ასწლოვანი ხეებით“, – აცხადებს მაჭუტაძე.

მისი თქმით, მან ახალციხიდან ბორჯომში წაიყვანა მუნიციპალიტეტის ბალანსზე არსებული მძიმე ტექნიკა, მათ შორის ტრაქტორი და გრეიდერი: „ასევე წამოვიყვანე სახანძრო და სამაშველო სამსახურები. გზებზე ჩამოუსლია ქვა–ღორღი და ამ წუთებში წმენდენ“.

როგორც გუბნერნატორი აცხადებს, ქალაქში დაგროვილი უხვი ნალექი სანიაღვრეებმა უკვე გაატარა, თუმცა გზაზე ნაშალი მასალაა მოდებული.
გუბერნატორი ამბობს, რომ სტიქიის შედეგების სალიკვიდაციოდ, თანხა სარეზერვო ფონდიდან გამოიყოფა, თუმცა ადგილობრივი ბიუჯეტის ფული მიყენებულ ზარალს ვერ გაწვდება.

ამ დრომდე ჩაკეტილია გზა წაღვერის მიმართულებით. როგორც „სამხრეთის კარიბჭეს“ შსს–ში განუცხადეს პოლიცია მობილიზებულია და მიმდინარეობს გაწმენდითი სამუშაოები.

შეგახსენებთ, ახალციხის შემდეგ, დღეს, 4 აგვისტოს, სტიქიამ ბორჯომს შეუტია. ძლიერი წვიმა და სეტყვა ბორჯომში საღამოს დაიწყო. წვიმისგან მოვარდნილი ნიაღვრებისგან დაიტბორა ქუჩები, ქარისგან დაზიანდა ელექტროგადამცემი ხაზები. როგორც თბილისისკენ მიმავალი ახალციხელები ამბობენ "სამხრეთის კარიბჭესთან",დატბორილი გზის გამო თბილისი–ახალციხის მაგისტრალზე საცობები იყო. ბორჯომში შუქი ამ დრომდე არაა. ქალაქში სამაშველო სამსახური მუშაობს.სეტყვა და ქარიშხალი იყო დღეს ცემშიც.

სტიქიამ ბორჯომ–ბაკურიანის მიმართულებთ გზის ნაწილი ჩაკეტა. ძლიერმა წვიმამ და ქარმა წაღვერის გზაზე ხეები მოტეხა, რის გამოც ამ დროსთვის მოძრაობა შეფერხებულია.

სტიქიის გამო, ბორჯომში, ე.წ. გოგირდის აბანოებში 20 ადამიანი ჩარჩა. ყველა მათგანი უვნებლად გამოიყვანეს.

[თამუნა უჩიძე, ბორჯომი]