სტიქიამ ბორჯომ–ბაკურიანის მიმართულებით გზის ნაწილი ჩაკეტა

ამის შესახებ „სამხრეთის კარიბჭესთან“ ბორჯომის მუნიციპალიტეტის მოადგილემ ვახტანგ ოჩხიკიძემ განაცხადა.

მისი თქმით, გზის სავალი ნაწილი ჩაკეტილია, ტექნიკა მუშაობს და მოძრაობა მალე სრულად აღდგება.

წაღვერის პარალელურად, გზას წმენდენ სამაშველო სამსახურის წარმოამდგენლები ბორჯომშიც. ამ წუთებში რუსთაველის ქუჩაზე დატბორილია სახლები. ასევე, ადგილობრიოვების ინფორმაციით ნიაღვარი შევარდა „ავერსის“ აფთიაქშიც.

ძლიერმა ნიაღვარმა და მოტეხილმა ხეებმა თბილისი–ბორჯომის ცენტრალურ მაგისტრალზე დაახლოებით 30 წუთის განმავლობაში მოძრაობაც შეაფერხა. გადაადგილება შეზღუდული იყო ორივე მიმართულებით.

„მანქანები წყალში ცურავს, სიბნელეა. გზაზე მოტეხილი ხეები და თუნუქები ყრია“, – ამბობს ერთ–ერთი ახალციხელი, რომელიც ახალციხიდან თბილისის მიმართულებით მიდის.

ბორჯომის მუნიციპალიტეტის გამგებელი დიმიტრი ყიფიანი ამ დრომდე „სამხრეთის კარიბჭესთან“ კომენტარს ვერ აკეთებს: „საშინელება ხდება, ჯერ ვერაფერზე დაგელაპარაკებთ“.

სამაშველო სამსახურში აცხადებენ, რომ ყველა სამუშაო ჯგუფი გასულია და წყლის ამოტუმბვის სამუშაოებს ასრულებს.

ვიდეომასალა დატბორილი ბორჯომიდან, რომელიც მოგვაწოდა მოქალაქემ.




[თამუნა უჩიძე, ბორჯომი]