„ნაციონალების“ აქცია „ახალციხის ციხის“ შესასვლელთან დასრულდა

„ახალციხის ციხის“ შესასვლელთან შეკრებილ მხარდამჭერებს ახალციხისა და ადიგენის საარჩევნო ოლქებში „ნაციონალური მოძრაობის“ დეპუტატობის კანდიდატმა ვაჟა ჩიტაშვილმა მიმართა. მათ აქციაში მონაწილეობისთვის მადლობა გადაუხადა და კიდევ ერთხელ მხარდაჭერისკენ მოუწოდა.

ნინოწმინდასა და ახალქალაქში „ნაციონალური მოძრაობის“ მაჟორიტარი დეპუტატობის კანდიდატი არსენ კარაპეტიანი დღევანდელ დღეს ისტორიულს უწოდებს: „კარგად გვახსოვს ის გზა რაც გამოვიარეთ, რაც გავაკეთეთ. დღევანდელ საქართველოში კი ქვეყნის ყველაზე მაგარი რეფორმატორი, ვანო მერაბიშვილი უკანონოდაა დასჯილი“.

ადიგენის მაჟორიტარი დეპუტატი „ნაციონალური მოძრაობიდან“ ზურაბ ჩილინგარაშვილი კი მოქმედ ხელისუფლებას მუშაობას უწუნებს: „თვალები ცრემლებით მევსება, ხალხს რომ ვუყურებ, ეს მოტყურბული ხალხია, გაიზარდა უმუშევრობა მშენებლობის მაგივრად არის ნგრევა, უნიათო მთავრობა გვყავს. ამიტომ მივმართავ ივანიშვილის მთავრობას, რომ 2 თვეში მისი ხელისუფლება დასრულდება“.

ბორჯომისა და ასპინძის მაჟორიტარი დეპუტატობის კანდიდატი „ნაციონალური მოძრაობიდან“ ტარიელ ლონდარიძე კი დარმწუნებულია, რომ „8 ოქტომბრის შემდეგ ყველა პოლიტ–პატიმარი გამოვა ციხიდან და ივანიშვილის მთავრობა წარსულს ჩაბარდება“.

„ნაციონალების“ აქცია ახალციხეში საათზე მეტ ხნს გაგრძელდა.

„შევხვდებით ერთმანეთს 8 ოქტომბერს, მადლობა, რომ იყავით ჩვენს გვერდით. თავისუფლება ვანო მერაბიშვილს!" – მიმართა დასასრულს კიდევ ერთხელ ამომრჩევლებს ჩიტაშვილმა.



[sknews.ge]