ენმ-ს მაჟორიტარი დეპუტატობის კანდიდატმა წინასაარჩევნო კამპანია მერაბიშვილის სოფლიდან დაიწყო

სოფელ უდეში ვაჟა ჩიტაშვილი სამი დღის წინ იმყოფებოდა, ახლა იგი ამომრჩევლებს ასპინძის მუნიციპალიტეტის სოფლებში ხვდება.

კარდაკარის პრინციპით ჩიტაშვილმა უკვე შემოიარა მირაშხანი, თმოგვი, ნაქალაქევი, ხიზაბავრა, სარო, ნიჯგორი, აწყვიტა, რუსთავი და ოშორა.

„შეხვედრები გაცნობითი ხასიათისაა. ვუხსნი, რომ მე ვარ ენმ–ს კანდიდატი, რომ ოთხ რაიონს ერთი დეპუტატი ეყოლება და ყველა კანდიდატს, მათ შორის ჩემს თავს წარმატებას ვუსურვებ“,-ამბობს ჩიტაშვილი.

მან აღნიშნა, რომ უფრო დაწვრილებით საკუთარი სტრატეგიის და გეგმების თაობაზე, უახლოეს მომავალში ფართომასშტაბიან შეხვედრებს, მხარდამჭერებთან ერთად გამართავს, რომელიც კითხვა-პასუხის რეჟიმში გაიმართება.

პარტიაში გვითხრეს, რომ ვაჟა ჩიტაშვილმა წინასაარჩევნო კამპანია ყოფილი შს მინისტრის, ვანო მერაბიშვილის სოფელ უდედან იმიტომ დაიწყო, რომ ენმ–ს ყველაზე მეტი მხარდამჭერი სწორედ ამ სოფელში ჰყავს.

ასპინძის შემდეგ ენმ–ს მაჟორიტარი დეპუტატობის კანდიდატი ასპინძაში, შემდეგ კი ახალციხესა და ადიგენში განაგრძობს.

„შეხვედრებზე პრობლემებზე არ ვსაუბრობთ, თუმცა მე ვგრძნობ რომელ სოფელში რა პრობლემაა. რომ შევდივარ ეზო-კარ მიდამოზე და დავტრიალდები უკვე ვხვდები რა ხდება კონკრეტულ ოჯახში, სოფელში“, – ამბობს ჩიტაშვილი.

ბოლო მონაცემებით, სამცხის ოლქში მაჟორიტარობის კანდიდატი ხუთმა პარტიამ დაასახელა: "ევროპული საქართველოდან" ზურა ჩილინგარაშვილი იქნება, "ქართული ოცნებიდან" – ანტონ ობოლაშვილი იბრძოლებს, ვაჟა ჩიტაშვილი – "ნაციონალური მოძრაობიდან", "თავისუფლება ზვიად გამსახურდიას გზას" ზურა ხუციშვილი წარმოადგენს, ხოლო "თავისუფალი საქართველო" – გოდერძი კუბლაშვილის წარდგენას გეგმავს.

საპარლამენტო არჩევნები საქართველოში 2020 წლის ოქტომბერში, ისტორიაში პირველად, 120/30 სისტემით ჩატარდება.

[მარიამ ბარძიმაძე]