'ნაციონალებმა’ ახალციხისა და ადიგენის მაჟორიტარი წარადგინეს

„დიდი წარდგენა ვაჟას არ სჭირდება. მე მახსოვს, რომ 4 წლის წინაც ზუსტად ამ სკვერში წარვადგინეთ ვაჟა და ეს კარგად გვაქვს დაცდილი“, – განაცხადა „ერთიანი ნაციონალური მოძრაობის“ ერთ–ერთმა ლიდერმა დავით ბაქრაძემ.

შეგახსენებთ, ახალციხეში დღეს „ერთიანი ნაციონალური მოძრაობის“ წევრები, დავით ბაქრაძე და ნიკა მელია იმყოფებიან. ისინი ოფიციალურად ასახელებენ მაჟორიტარი დეპუტატობის კანდიდატებს.

შეხვედრა ღია ცის ქვეშ, შოთა რუსთაველის ძეგლთან მიმდინარეობს.

ვაჟა ჩიტაშვილის წარდგენის შემდეგ, შეკრებილებს "ნაციონალური მოძრაობის" ახალმა სახემ, ვანო მერაბიშვილის ადვოკატმა ოთო კახიძემ მიმართა. მან ისაუბრა იმის შესახებ, რომ 14 ივნისს, სტრასბურგის სასამართლომ ვანო მერაბიშვილის საქმეზე გადაწყვეტილება უნდა გამოაცხადოს.

"ვანო შენი მშობლიური კუთხიდან, შენი აშენებული რაბათის წინ, შენი მშობლების, მეგობრების და თანამებრძოლების წინ ვდგავარ და გამცნობბ რომ 14 ივნისს, სტრასბურგის სასამართლო გამოაცხადებს თავის გადაწყვეტილებას ვანო მერაბიშვილის საქმეზე.მე ძალიან დიდხანს ველოდებოდი ამ დღეს. მოგეხსენებათ გამოთქმა, "სამართალი ურმით დადისო", მე მინდა ვუთხრა ყველა გულშეატკივარს, რომ სიმართლე აუცილებლად იზეიმებს და ჩვენ აუციებლად გავიმარჯვებთ", – მიმართა შეკრებილებს კახიძემ. შემდეგ კი ვაჟა ჩიტაშვილის მხარდაჭერისკენ მოუწოდა.

ოთო კახიძის შემდეგ, ტრიბუნა ნიკა მელლიამ დაიკავა. მელია ამომრჩევლებს ამ წუთებში მიმართავს.

[ნინო ნარიმანიშვილი, ახალციხე]