რატომ ატირდა ვანო მერაბიშვილის დედა 'ნაციონალების' შეხვედრაზე

"ადამიანი, რომელმაც ბეჭებზე დადო ქურდული სამყარო" – ამ სიტყვებით გაიხსენეს ვანო მერაბიშვილი, რაზეც მესხეთის თეატრში შეკრებილი "ნაციონალური მოძრაობის" მხარდამჭერები ფეხზე წამოდგნენ და ვანო მერაბიშვილს ტაში დაუკრეს.

"ერთიანი ნაციონალური მოძრაობის" შეხვედრა, რომელიც მესხეთის თეატრში გაიმართა, საქართველოს ყოფილი პრემიერ მინისტირზე, ვანო მერაბიშვილზე საუბრით დაიწყო. ახალციხის მაჟორიტარმა დეპუტატმა ვაჟა ჩიტაშვილმა განაცხადა, რომ მერაბიშვილს დაახლოებით ერთი თვის წინ შეხვდა და მან ახალციხელებთან მოკითხვა დააბარა.

"ვანომ ყველა მოგიკითხათ, მან მეცნიერულად დაასაბუთა თუ როგორ შეიძლება ჩვენი გამარჯვება. ვანო კარგად გამოიყურება, მხნედ, იმედი გვაქვს, რომ მალე დაგვიბრუნდება და ჩვენთან ერთად გააგრძელებს ბრძოლას გამარჯვებისთვის", – განაცხადა შეხვედრაზე ვაჟა ჩიტაშვილმა (სტილი დაცულია).

ჩიტაშვილის ამ განცხადებას, ვანო მერაბიშვილის დედის, ჟენია მერაბიშილის ცრემლები მოჰყვა. დღევანდელ შეხვედრაზე, საქართველოს ყოფილი პრემიერ მინისტრი არაერთხელ ახსენეს.

"ის დღე, როცა ვანო მერაბიშვილი, გიგი უგულავა და ბაჩო ახალაია ციხეში სხედან წარუმატებელია", – აღნიშნა "ნაციონალური მოძრაობის" აღმასრულებელმა მდივანმა სერგო რატიანმა.

"გვჩაგრავენ, გვსჯიან, სამცხე–ჯავახეთს მხოლოდ იმისთვის სჯიან, რომ ვანო ამ რეგიონიდანაა. ვანოს შეეძლო დაეტოვებინა ქვეყანა, თუმცა ბოლომდე ჩვენს გვერდითაა,საკუთარი თავი გაწირა და "ნაციონალურ მოძრაობას" ემსახურება", – ამბობს ადიგენის მაჟორიტარი დეპუტატი ზურაბ ჩილინგარაშვილი.

მისი თქმით, 24 დეკემბერს, ვანო მერაბიშვლთან შეხვედრა აქვს დაგეგმილი, ამ განცხადებას დარბაზში შეკრებილი "ნაციონალების" მხრიდან ისევ ტაში მოჰყვა: "თქვენს მოკითხვას, თქვენს ოვაციებს და ტაშს ვანოს გადავცემ".


შეგახსენებთ, დღეს, 12 დეკემბერს, ახალციხეს "ერთიანი ნაციონალური მოძრაობის" ლიდერები სერგო რატიანი, მიხეილ მაჭავარიანი და დავით დარჩიაშვილი ესტუმრნენ. ისინი სამცხე–ჯავახეთის მცხოვრებლებს მოახლოებულ არჩევნებზე ესაუბრნენ.
[ვარლამ წიკლაური, ახალციხე]