რესურსცენტრებში რეორგანიზაცია იგეგმება

საქართველოს განათლებისა და მეცნიერების სამინისტრომ, საგანმანათლებლო რესურსცენტრის უფროსის თანამდებობის დაკავების მიზნით კონკურსი 18 იანვარს გამოაცხადა. კონკურსი ცხადდება საქართველოს ყველა იმ რეგიონში, სადაც რესურსცენტრს ხელმძღვანელის დროებით მოვალეობის შემსრულებელი ჰყავს.

ახალციხის საგანმანათლებლო რესუსცენტრის უფროსის მოვალეობის შემსრულებელი ნინო დემეტრაძე ამ დრომდე დაკავებულ თანამდებობაზე მუშაობს და ამბობს, რომ კონკურსში მონაწილეობის მიღებას თვითონაც აპირებს.

”რადგან ამ მხრივ არანაირი შეზღუდვა არ არსებობს, კონკურსში მონაწილოებას მიღებას მეც ვაპირებ. ვაკანსიაზე განაცხადის შევსება ნებისმიერ მსურველს შეუძლია”, - ამბობს დემეტრაძე.

ნინო დემეტრაძე ახალციხის საგანმანათლებლო რესუსცენტრის უფროსის მოვალეობის შემსრულებლად 2010 წლის 18 იანვარს დაინიშნა.

კონკურსში მონაწილეობის მსურველებს განაცხადის შევსება 5 თებერვლის ჩათვლით შეუძლიათ. ტესტირების თარიღი და ადგილი განათლების და მეცნიერების სამინისტროს ვებგვერდზე 7 თებერვლიდან გამოქვეყნდება.

[თინათინ ზაზაძე, ახალციხე]