ახალციხის არაქართულენოვანი სკოლების დირექტორებმა გამოცდა ვერ ჩააბარეს

ახალციხის მუნიციპალიტეტში არსებული 38 სკოლიდან, გამოცდაზე 4-ის გარდა ყველა დირექტორი გავიდა, თუმცა, ამათგან გამოცდა მხოლოდ რვამ ჩააბარა.

ამ რიცხვში ვერ მოხვდნენ არაქართულენოვანი სკოლების დირექტორები. მუნიციპალიტეტის მასშტაბით არსებული 14 არაქართულენოვანი სკოლიდან გამოცდაზე ყველა მათგანი გავიდა, თუმცა, 60%-იანი ბარიერი ვერცერთმა ვერ გადალახა.

„თოთხმეტივე სკოლის დირექტორი ამბობს, რომ გამოცდა რთული იყო. მათ ტესტირება ქართულ ენაზე ჰქონდათ, რის გამოც მაღალი ქულების აღება გაუჭირდათ“,- ამბობს ახალციხის საგანმანათლებლო რესურსცენტრის უფროსის მოვალოების შემსრულებელი დიანა ინასარიძე.

გარდა მოქმედი დირექტორებისა სერთიფიცირებაში მონაწილოება ნებისმიერ უმაღლეს განათლების მქონე პირს შეეძლო.

„ჯამში 16-მდე დირეტორმა ჩააბარა გამოცდა. მათში არიან ის პირები, რომლებიც არ არიან დირექტორები, მათ უბრალოდ სურვილი აქვთ, რომ ჩააბარონ გამოცდები“,-ამბობს დიანა ინასარიძე.

მათ ვინც ბარიერი ვერ გადალახა, გასაჩივრება ერთი თვის განმავლობაში შეუძლიათ. რესურსცენტრის უფროსის მოვალეობის შემსრულებლის თქმით, ის დირექტორები, რომლებმაც სერთიფიცირება ვერ გაიარეს, ჩვეულებრივად გააგრძელებენ მუშაობას. ჯერ მოვალოების შემსრულებლად დარჩებიან ის დირექტორებიც, რომლებმაც გამოცდა წარმატებით ჩააბარეს.

„გამოცდის წარმატებით ჩაბარების მიუხედავად დირექტორები ისევ მოვალოების შემსრულებლად დარჩებიან, სანამ გასაუბრებას არ გაივლიან. მეორე ეტაპის გავლის შემთხვევაში უკვე სერთიფიცირებული დირექტორები იქნებიან“,- ამბობს დიანა ინასარიძე.

სერთიფიცირების ორივე ეტაპის წარმატებით გავლის შემთხვევაში დირექტორობის მსურველს დირექტორობის უფლების დამადასტურებელი სერთიფიკატი გადაეცემა, რომელიც მას საშუალებას მისცემს მონაწილეობა მიიღოს დირექტორების შესარჩევ კონკურსში.

„სერთიფიცირებულ დირექტორს უფლება აქვს ნებისმიერი სკოლა აირჩიოს, სადაც მას სურს დირექტორობა. ის თავის კანდიდატურას იმავე სკოლის სამეურვეო საბჭოს წარუდგენს თუ სამეურვეო საბჭომ ვერ აირჩია დირექტორი მაშინ მას დირექტორად განათლებისა და მეცნიერების მინისტრი ნიშნავს“,-ამბობს ინასარიძე.

[მანანა სარაშვილი, ახალციხე]