საკადრო ცვლილება ახალციხის რესურსცენტრში

უფროსი სპეციალისტი დიანა ინასარიძე ახალციხის საგანმანათლებლო რესურცენტრის უფროსის მოვალეობის შემსრულებლად 11 მარტს დაინიშნა. მან ამ პოსტზე ნინო დემეტრაძე შეცვალა. რესურცენტრში ამბობენ, რომ დიანა ინასარიძე მოვალეობის შემსრულებლად ახალი ხელმძღვანელის არჩევამდე დარჩება.

შეგახსენებთ, რომ საქართველოს განათლებისა და მეცნიერების სამინისტრომ, საგანმანათლებლო რესურსცენტრის უფროსის თანამდებობის დაკავების მიზნით კონკურსი 18 იანვარს გამოაცხადა.

”სანამ საკონკურსო ვადები დამთავრდება და გამარჯვებული გამოვლინდება ხელმძღავანელის მოვალეობას მე შევასრულებ ”, -ამბობს დიანა ინასარიძე.

ნინო დემეტრაძე ახალციხის საგანმანათლებლო რესურსცენტრის უფროსის მოვალეობის შემსრულებლად 2010 წლის 18 იანვარს დაინიშნა. მიმდინარე წლის 1 მარტს კი თანამდებობა პირადი განცხადების საფუძველზე დატოვა.

შეგახსენებთ, რომ რესურსცენტრის ხელმძღვანელის შესარჩევი კონკურსი სამ ეტაპად ტარდება. კონკურსში მონაწილეობას რესურსცენტრის ყოფილი ხელმძღვანელი ნინო დემეტრაძეც იღებს. მისი თქმით, პირველი ეტაპი წარმატებით გაიარა და ახლა მეორე ეტაპზეა გადასული.

როდის გამოვლინდება კონკურსში გამარჯვებული ჯერ ცნობილი არ არის.

[თინათი ზაზაძე, ახალციხე]