რა ვითარებაა ამ დროისთვის ერევანში

სომხეთის შინაგან საქმეთა სამინისტროს ინფორმაციით, უსაფრთხოების ძალების წარმომადგენლები განაგრძობენ მოლაპარაკებებს იმ შეიარღებულ ჯგუფთან, რომელსაც ერევნის პოლიციის ერთ-ერთი ქვეგანყოფილება აქვთ დაკავებული და მძევლად ჰყავთ აყვანილი ექვსი პირი. სომხეთის შინაგან საქმეთა მინისტრის პირველი მოადგილის, გენერალ უნან პოღოსიანის თქმით, ხელისუფლება, არ აპირებს თავდამსხმელების მოთხოვნების შესრულებას.

ბოლო ინფორმაციით დაჭრილია ოთხი სამართალდამცველი. ამათგან ორის მდგომარეობა უკიდურესად მძიმეა. დაჭრილების ნაწილი სამოქალაქო საავადმყოფოში, ნაწილი კი, სამხედრო ჰოსპიტალშია მოთავსებული.

ქვეყანაში შექმნილი ვითარება სამართალდამცავი უწყების პასუხისმგებელ პირებთან ერთად განიხილა სომხეთის პრეზიდენტმა სერჟ სარქსიანმა. სომხური მედიის ინფორმაციით, თათბირზე ქვეყნის პირველ პირს იმ ღონისძიებების შესახებ მიაწოდეს ინფორმაცია, რომლებიც ამ დროისთვის სამართალდამცველების მიერ ხორციელდება.

შეგახსენებთ, დღეს, 17 ივლისს, ერევანში, ერებუნის რაიონში, შეიარაღებული პირები ერთ–ერთი პოლიციის შენობაში შეიჭრნენ და შენობის აღება სცადეს. შემთხვევის დროს გარდაიცვალა ერთი ადამიანი.

ამბოხებულები 20 ივნისს დაკავებული ჟირაირა სეფილიანის გათავისუფლებას ითხოვენ, რომელიც იარაღის უკანონო შეძენა-შენახვისათვის არის ბრალდებული.

გამოძიების ინფორმაციით, სეფელიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას. მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.

[ვარლამ წიკლაური, ახალციხე]