ერევანში, პოლიციის შენობაზე თავდასხმისას, ერთი პოლიციელი დაიღუპა

გამოცემის ინფორმაციით, პოლიციის ოფიცერი დღეს, 17 ივლისს, ერევანში, ერებუნის რაიონში, პოლიციის შენობაზე თავდასხმის დროს დაიღუპა.

მისივე ინფორმაციით. ეროვნული უსაფრთხოების სამსახურის თანამშრომლების მიერ ჩატარებული ოპერაციის შედეგად კი მძევლად აყვანილი 2 ადამიანი გათავისუფლებულია.

„უფლებადამცველი ორგანოები ბოლომდე აკონტროლებენ ვითარებას და სიტუაციის გამოსასწორებლად ყველა საჭირო ზომებს მიმართავენ“, – აცხადებენ სომხეთის უშიშროების სამსახურში.

Ekhokavkaza სომხურ ადგილობრივ გამოცემებზე დაყრდნობით წერს, რომ იმ ადგილას, სადაც პოლიციის შენობა მდებარეობს, მოსახლეობის ევაკუაცია მიმდინარეობს. მისივე ინფორმაციით, პოლიციის შენობასთან მისასვლელი გზები ალყაშია მოქცეული. ადგილზე მობილიზებულია პოლიცია და სამხედრო დანაყოფები, მათ შორის მძიმე ჯავშანტექნიკა.

შეგახსენებთ, დღეს, 17 ივლისს, ერევანში, ერებუნის რაიონში, შეიარაღებული პირები ერთ–ერთი პოლიციის შენობაში შეიჭრნენ და შენობის აღება სცადეს. შემთხვევის დროს გარდაიცვალა ერთი ადამიანი.

ამბოხებულები 20 ივნისს დაკავებული ჟირაირა სეფილიანის გათავისუფლებას ითხოვენ, რომელიც იარაღის უკანონო შეძენა-შენახვისათვის არის ბრალდებული.

გამოძიების ინფორმაციით, სეფელიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას. მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.

[ნინო ნარიმანიშვილი, ახალციხე]