ერევნის პოლიციის შენობა ისევ შეიარაღებულ დაჯგუფებას აქვს დაკავებული

ერევნის შინაგან საქმეთა მინისტრის მოადგილის ჰუნან პოღოსიანის ინფორმაციით ამ დროისთვის შეიარაღებულმა დაჯგუფებამ პოლიციის შენობიდან ორი მძევალი გაათავისუფლა. აქედან ერთი სამართალდამცველია, მეორე კი, სასწრაფო–სამედიცინო დახმარების თანამშრომელი.

"მოლაპარაკებები ჯერ კიდევ გრძელდება, რადგან არც ერთი მხარე დათმობას არ აპირებს. შეიარაღებული ჯგუფი ცდილობს, გვაიძულოს სეფილიანი გავათავისუფლოთ და მათ შევახვედროთ, მაგრამ ეს არ მოხდება“,–ამბობს სომხეთის შინაგან საქმეთა მინისტრის მოადგილე ჰუნან პოღოსიანი.

მისი თქმით, თუ შეიარაღებული ადამიანები დათმობაზე არ წავლენ პოლიციის შენობას შტურმით აიღებენ.

მედიაში ვრცელდება ინფორმაცია, რომ დღეს დილით ერევნის პოლიციის დანაყოფებმა ოპოზიციის რამდენიმე მხარდამჭერი დააკავეს. მათ ადგილსამყოფელს კი, ადვოკატებმა და ოჯახის წევრებმა ამდრომდე ვერ მიაკვლიეს.

შეგახსენებთ, გუშინ, 17 ივლისს, ერევანში, ერებუნის რაიონში, შეიარაღებული პირები ერთ–ერთი პოლიციის შენობაში შეიჭრნენ და შენობის აღება სცადეს. შემთხვევის დროს გარდაიცვალა ერთი ადამიანი.

ამბოხებულები 20 ივნისს დაკავებული ჟირაირა სეფილიანის გათავისუფლებას ითხოვენ, რომელიც იარაღის უკანონო შეძენა-შენახვისათვის არის ბრალდებული.

გამოძიების ინფორმაციით, სეფელიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას. მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.

[ვარლამ წიკლაური, ახალციხე]