სომხეთსა და აზერბაიჯანს შორის შეიარაღებული დაპირისპირება გრძელდება

სომხური სააგენტოს, „არმენპრესის“ მიერ დღეს, 14 ივლისს გავრცელებული ინფორმაციის მიხედვით, ორმხრივი დაპირისპირებისას სომხეთის შეიარაღებული ძალების ორი სამხედრო მოსამსახურე - მაიორი გარუშ ჰამბარცუმიანი და კაპიტანი სოს ელბაკიანი, აზერბაიჯანის მხრიდან, სომხეთ-აზერბაიჯანის სახელმწიფო საზღვარზე ცეცხლსასროლი იარაღით დაჭრეს.

მოგვიანებით, თავდაცვის სამინისტრომ განაცხადა, რომ დაიღუპა კიდევ ორი სერჟანტი: სმბატ გაბრიელიანი და გრიშა მატევოსიანი.

მათივე ცნობით, აზერბაიჯანის შეიარაღებულმა ძალებმა 12 ივლისს თავდასხმა დაიწყეს ტავუშის პროვინციაზე, არტილერიის, ნაღმტყორცნებიდან და თვითმფრინავების გამოყენებით. ნაღმტყორცნებით დაიბომბა ქალაქი ჩინარი, დაზიანდა მშვიდობიანი მოქალაქეების სახლები.

აზერბაიჯანის თავდაცვის სამინისტროს განცხადებით კი, თოვუზის რაიონში, სომხეთის შეიარაღებული ძალების იერიშის მოგერიებისას, დაიღუპა 7 სამხედრო, მათ შორის, გენერალი ფოლად გაშიმოვი და პოლკოვნიკი ილგარ მირზოევი.

როგორც აზერბაიჯანის სააგენტო APA იტყობინება, 13-14 ივლისის ღამით გრძელდებოდა ბრძოლა აზერბაიჯანის და სომხეთის საზღვრის თოვუზის მიმართულებით. APA-ს ამცნეს აზერბაიჯანის თავდაცვის სამინისტროში, რომ მოწინააღმდეგის ქმედების შესაჩერებლად აზერბაიჯანის ძალებმა გაანადგურეს სხვადასხვა დანიშნულების სამხედრო ტექნიკა, სამეთაურო პუნქტი, თავდაცვის სიღრმეში მდებარე რეზერვი და ცოცხალი ძალა.

სააგენტო APA იტყობინება, რომ სომხეთის შეიარაღებული ძალების მიერ თოვუზის რაიონის მიმართულებით გახსნილი საარტილერიო ცეცხლის შედეგად მშვიდობიანი მოქალაქე დაიღუპა.

ორ მეზობელ ქვეყანას წლების განმავლობაში კონფლიქტი აქვთ აზერბაიჯანის დე იურე ტერიტორიის, დიდწილად ეთნიკური სომხებით დასახლებული მთიანი ყარაბაღის რეგიონის გამო.

ევროკავშირმა, აშშ-მა და რუსეთმა მხარეებს თავშეკავებისკენ მოუწოდეს არაერთ, 13 ივლისს გავრცელებულ განცხადებებში.

[sknews.ge]