სოფელ მინაძესთან ავტომობილი ხევში გადავარდა

ავტოსაგზაო შემთხვევა დღეს, 15 ივლისს, დაახლოებით 18:30 საათზე მოხდა. ახალქალაქიდან თბილისის მიმართულებით მოძრავი ავტომობილი საპირისპირო მხარეს გადავიდა და ხეობაში, მდინარე მტკვართან ჩავარდა.

„წინიდან მანქანა შემომხვდა, აცილება ვცადე, მუხრუჭს დავაჭირე, ამ დროს მეორე მანქანაც მოდიოდა, ვცადე ჩემი მანქანა გამესწორებინა, მაგრამ მომასრიალა და ხევში გადავვარდით“, – ამბობს შპს „ეკომედის“ თანამშრომელი, რომელიც ავტომობილს მართავდა.

მისი თქმით, მანქანაში მისი თანამშრომელიც იმყოფებოდა, რომელიც სასწრაფო–სამედიცინო დახმარების ბრიგადამ ახალციხის ერთ–ერთ კლინიკაში გადაიყვანა: „თავზე და მუხლზე ჰქონდა ნაკაწრი. გადაიყვანეს შემოწმების მიზნით. მე არაფერი დამშავებია და არ დამჭირდა საავადმყოფოში გადაყვანა“.

შპს „ეკომედი“ კლინიკებიდან სამედიცინო ნარჩენების გატანა – უტილზაციას უზრუნველყოფს. აღნიშნული მანქანით „ეკომედის“ თანამშრომლებს სავარაუდოდ სამედიცინო ნარჩენები გადაქონდათ. შემთხვევის ადგილზე მანქანიდან ლურჯი ცელოფნის პარკებით ნარჩენებია გადმოყრილი.

შემთხვევის ადგილზე მობილიზებულია ახალციხის საპატრულო პოლიციის რამდენიმე ეკიპაჟი და ევაკუატორი.

შსს–ს ინფორმაციით ძიება სსკ–ის 276–ე მუხლის პირველი ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.



[თინათინ ზაზაძე, ახალციხე]