ავარია ივლიტასთან – დაშავებულია 5 ადამიანი

შემთხვევა დაახლოებით, 10:30 საათზე მოხდა. ერთმანეთს საპირისპირო მიმართულებით მოძრავი „ბეემვესა“ და „ჰონდას“ მარკის ავტომობილები შეეჯახნენ. შემთხვევის შედეგად 5 ადამიანი დაშავდა.

5 დაშავებულიდან სასწრაფო სამედიცინო დახმარების ბრიგადამ ორი „უნიმედი სამცხეს“ ახალციხის სამედიცინო დაწესებულებაში გადაიყვანა, სამ მგზავს კი ადგილზე გაუწია დახმარება.

„დაშავებულები ავტომობილების მძღოლები არიან, თავისა და ზემო კიდურების მსუბუქი ტრამვა აღენიშნებოდათ“, –განუცხადეს „სამხრეთის კარიბჭეს“ სასწრაფო სამედიცინო დახმარების სამსახურის პრესსამსახურში.

შემთხვევის ადგილზე ამ დრომდე მუშაობენ საპატრულო პოლიციის თანამშრომლები და ექსპრეტ–კრიმინალისტები.

შინაგან საქმეთა სამინისტროში განმარტავენ, რომ გამოძიება სსკ-ის 276–ე მუხლის პირველი ნაწილით მიმდინარეობს. აღნიშნული მუხლი გულისხმობს ავტომობილის, ტრამვაის, ტროლეიბუსის, ტრაქტორის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის
ნაკლებად მძიმე დაზიანება. ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

[ვარლამ წიკლაური, ახალციხე]