ხერთვისთან მანქანა ხევში გადავარდა–არიან დაშავებულები

ავტოსაგზაო შემთხვევა დღეს, 3 ივლისს დილით მოხდა. ადგილობრივების განმარტებით მსუბუქი მანქანის მძღოლმა საჭე ვერ დაიმორჩილა, გზის სავალი ნაწილიდან გადავიდა და ხევში გადავარდა.

მანქანაში ხუთი პირი იმყოფებოდა, მათ შორის ერთი მცირეწლოვანი.

დაშავებულები პირველად ასპინძის სამედინიცო დაწესებულებაში მიიყვანეს, შემდეგ კი ახალციხის რეფერალურ საავადმყოფოში გადაიყვანეს.

„ჩვენ ქირურგიული სტაციონარი არ გვაქვს და მაშინვე გადაიყვანეს ახალციხის კლინიკაში. სამი ქალი, ერთი ბავშვი და ერთი მამაკაცი შემოიყვანეს. აქედან ორი ქალის მდგომარეობა შედარებით მძიმეა, დანარჩენს სამს კი უმნიშვნელო დაზიანებები აქვთ“, – განაცხადა ასპინძის სამედიცინო დაწესებულების ხელმძღვანელმა მანანა ცინაძემ.

როგორც „სამხრეთის კარიბჭეს“ შინაგან საქმეთა სამინისტროში განუცხადეს, მომხდარზე ძიება სისხლის სამართლის კოდქსის 276–ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[თინათინ ზაზაძე, ასპინძა]