ადიგენში გაზიფიკაცია შეჩერდა

ადიგენის მუნიციპალიტეტში გაზიფიკაციის პროცესი გასული წლის სექტემბერში დაიწყო. სამუშაოები სოფელ უდიდან დაიწყო და მას საქართველოს გაზისა და ნავთობის კორპორაცია ასრულებდა. ინფორმაცია იმის შესახებ, რომ ადიგენში გაზიფიკაციის პროცესი შეწყდა, გასული წლის ოქტომბერში, ადიგენის მაჟორიტანმა კანდიდატმა ზურა ჩილინგარიშვილიმა საქართველოს პარლამენტში გააჟღერა. მან ამის შესახებ პრემიერმინისტრს ბიძინა ივანიშვილს კითხა.

”სამხრეთის კარიბჭე” ამ ფაქტით დაინტერესდა და აღნიშნული საკითხის გარკვევას შეეცადა. როგორც აღმოჩნდა, სამუშაოები არჩევნებთან დაკავშირებით დროებით შეწყდა, თუმცა ათ დღიანი შესვენების შემდეგ ნავთობისა და გაზის კონპორაციის წარმომადგენლებმა მუშაობა განაახლეს.

სიმონ პარუნაშვილის თქმით, გაზიფიკაციის პროცესი გარკვეული პერიოდით გაგრძელდა. თუმცა, ამ ეტაპზე საქართველოს ნავთობისა და გაზის კორპორაცია ადიგენის მუნიციპალიტეტში სამუშაოებს აღარ ასრულებს.

”არჩევნების შემდეგ, რაღაც პერიოდი აღდგა მუშაობა, ანუ დამთავრდა ცენტრალური შიდა ხაზის მშენებლობა. თუმცა, ჯერ კიდევ მთელი რიგი სამუშოებია დარჩენილი” - განმარტავს სიმონ პარუნაშვილი.

მისივე თქმით, მას შემდეგ რაც გაზიფიკაციის პროცესი შეჩერდა, აღნიშნული კომპანიის წარმომადგენლებს შეხვდნენ, რომლებიც დაჰპირდნენ, რომ სამუშაოები გაგრძელდებოდა. თუმცა, ამ დრომდე არავინ გამოჩენილა. რამ გამოიწვია აღნიშნული სამუშაოების შეჩერება, პარუნაშვილი ვერ აკონკრეტებს.

”შეიძლება ცივი ამინდების გამო შეწყვიტეს მუშაობა. არ ვიცი, ჩვენ არაფერს გვეუბნებიან, ჩვენგან რაც სჭირდებოდათ, ტექნიკური პირების მიცემა და პროექტის დამტკიცება, ეს უკვე შესრულებულია”, - ამბობს გამგებელი.

შეგახსენებთ, რომ ადიგენის მუნიციპალიტეტის გაზიფიკაცია პროექტის თანახმად 2013 წელს უნდა დასრულდეს.

[თამარ თოთაძე, ადიგენი]