რატომ შეწყდა ადიგენში გაზიფიკაციის პროცესი

საქართველოს პრემიერ-მინისტრობის კანდიდატმა ბიძინა ივანიშვილმა საპარლამენტო უმცირესობისა და უმრავლესობის წარმომადგენლების შეკითხვებს უპასუხა. სწორედ დღევანდელ შეხვედრაზე გაჟღერდა ის ფაქტი, რომ ადიგენის მუნიციციპალიტეტში არჩევნების შემდეგ ბუნებრივი აირის შეყვანა შეჩერებულია. ”ერთიანი ნაციონალური მოძრაობის” ადიგენის მაჟორიტარმა ზურა ჩილინგარიშვილმა, ბიძინა ივანიშვილს კითხვით მიმართა, არჩევნების შემდეგ რატომ იყო შეჩერებული მუნიციპალიტეტში გაზიფიკაციის პროცესი.

ადიგენის მუნიციპლაიტეტში გაზიფიკაციის პროცესი, საპარლამენტო არჩევნებამდე დაახლოებით ერთი თვით ადრე დაიწყო. სამუშაოებს საქართველოს გაზისა და ნავთობის კორპორაცია ასრულებს. ამ დროის განმავლობაში, ჯერ მხოლოდ ადიგენის მუნიციპალიტეტის ორ სოფელში, არალსა და უდეში ცენტრალური მილების გაყვანა მოხდა. ამ დრომდე სოფელ არლის დასაწყისიდან სოფელ უდის ცენტრამდე ცენტრალური გზა უკვე დაქსელილია.

ადიგენის მუნიციპალიტეტის გამგებლის სიმონ პარუნაშვილის თქმით, ამ ეტაპზე მუნიციპალიტეტში გაზიფიკაციის პროცესი შეჩერებულია და როდის აღდგება სამუშაოები მისთვის უცნობია.

თუმცა, სოფლებში, სადაც არჩევნებამდე ბუნებრივი აირის გაყვანა მიმდინარეობდა, ამბობენ, რომ სამუშაოები არჩევნების შემდეგაც გრძელდება. მათი თქმით, სოფლებში გაზიფიკაციის პროცესი მხოლოდ რამდენიმე დღით შეწყდა, რადგან სამუშაოებს თბილისიდან ჩამოსული ჯგუფი ასრულებდა და ხმის მისაცემად დედაქალაქში დაბრუნდნენ.

საქართველოს გაზისა და ნავთობის კორპორაციის წარმომადგენელი, რომელიც ადიგენში გაზიფიცირების პროცესს ხელმძღვანელობს, ამბობს, რომ სამუშაოები მხოლოდ რამდენიმე დღის განმავლობაში იყო შეჩერებული და ამ ეტაპზეგანახლებულია. ალექსანდრე ხარებავას თქმით, პროცესი 4 ოქტომბერს უნდა განახლებულიყო, თუმცა გარკვეული მიზეზების გამო 10 რიცხვამდე გადაიდო. ამ ეტაპზე არლისა და უდის ცენტრალური მაგისტრალი კეთდება, ხოლო შემდეგ შიდა დაქსელვა დაიწყება.

[თამარ თოთაძე, ადიგენი]