ადიგენში თოვლის გამო გადაადგილება არ შეფერხებულა

მთავარი → საზოგადოება 18.01.2013

ადიგენის მუნიციპალიტეტის ტერიტორიაზე დიდთოვლობის გამო შეფერხებები არ ყოფილა. მუნიციპალიტეტის გამგეობაში ამბობენ, რომ ყველა სოფელთან მისასვლელი გზა გაწმენდილია

თოვლიანი ამინდებისას ადიგენის მუნიციპალიტეტში რამდენიმე სოფელთან მისასვლელი გზა ჩაიკეტა. თუმცა, მუნიციპალიტეტის გამგებლის სიმონ პარუნაშვილის თქმით, აღნიშნული პრობლემა დროულად მოგვარდა და ამ ეტაპზე გადაადგილება შეფერხებული არაა. გზები ყველა სოფელთან გაიწმინდა.

მიმდინარე წელს, ადიგენის მუნიციპალიტეტში, დიდთოვლობისას გზების გაწმენდასა და ტექნიკური მარილის დაყრას ტენდერში გამარჯვებული კომპანია ”ემ-პა” უზრუნველყოფს. გზების მოსავლელად ადგილობრივი ბიუჯეტიდან 25 ათასი ლარია გამოყოფილი.

”სოფლებთან მისასვლელი გზები და ცენტრალური ქუჩები იწმინდება. დაბა აბასთუმანში გაიწმინდა როგორც ცენტრალური, ასევე შიდა ქუჩებიც”, - განმარტავს სიმონ პარუნაშვილი.

გასულ წელს აღნიშნული სამუშაოებისთვის ადგილობრივ ბიუჯეტში 37 ათასი ლარი იყო გათვალისწინებული.

[თამარ თოთაძე, ადიგენი]