ადიგენის გაზიფიკაცია არ გაჩერებულა

- რატომ შეჩერდა გაზიფიკაციის სამუშაოები ადიგენის მუნიციპალიტეტში? - ამ კითხვით პრემიერ-მინისტრობის კანდიდატს ბიძინა ივანიშვილს, ადიგენის მაჟორიტარმა დეპუტატმა ”ნაციონალური მოძრაობიდან” ზურაბ ჩილინგარაშვილმა, 24 ოქტომბერს გამართულ პარლამენტის სხდომაზე მიმართა.

- ეგ თქვენ უკეთ უნდა იცოდეთ, თქვენ იყავით ხელისუფლებაში და თქვენ დაიწყეთ გაზიფიცირება - ასეთი იყო კითხვაზე ივანიშვილის პასუხი.

ახლადარჩეული მაჟორიტარის მსგავსად, ადიგენის მუნიციპალიტეტის გამგებელი სიმონ პარუნაშვილიც აცხადებს, რომ ამ ეტაპზე მუნიციპალიტეტში გაზიფიკაციის პროცესი შეჩერებულია.

”ადიგენის მუნიციპლაიტეტში ბუნებრივი აირის შეყვანა ეტაპობრივად მიმდინარებდა. წინა მთავრობის დროს, 2013 წელში უნდა დასრულებულიყო და მუნიციპალიტეტის ძირითადი ნაწილი უნდა მოეცვა. ჩვენი ინფორმაციით, სამწუხაროდ, სამუშაოები გაჩერდა. უდე-არალში უკვე გაყვანილია მილები, ადიგენამდე უნდა ამოსულიყო, მაგრამ გაჩერდნენ. სოფლის რწმუნებული დაუკავშირდა კომპანიას, თუმცა მათაც ვერაფერი უთხრეს. ალბათ, გამოჩნდება ცოტა ხანში”, - გვითხრა მუნიციპალიტეტის გამგებელმა.

ადიგენის მუნიციპალიტეტში გაზიფიკაციის პროცესი, საპარლამენტო არჩევნებამდე დაახლოებით ერთი თვით ადრე დაიწყო. სამუშაოებს საქართველოს გაზისა და ნავთობის კორპორაცია ასრულებს. ამ დროის განმავლობაში, ჯერ მხოლოდ ადიგენის მუნიციპალიტეტის ორი სოფლის, არლისა და უდის დაქსელვა მიმდინარეობს.

იმ სოფლებში, სადაც სამუშაოები მიმდინარეობს, გამგებლისა და მაჟორიტარის ნათქვამს არ ადასტურებენ და ამბობენ, რომ სამუშაოები არჩევნების შემდეგაც გრძელდება.

მათივე თქმით, სოფლებში გაზიფიკაციის პროცესი მხოლოდ რამდენიმე დღით შეწყდა. სამუშაოებს თბილისიდან ჩამოსული ჯგუფი ასრულებდა და ხმის მისაცემად დედაქალაქში დაბრუნდნენ.

”მე სადაც ვცხოვრობ, იქ უკვე დაამთავრეს ცენტრალური მილების გაყვანა, ახლა სად მუშაობენ, არ ვიცი. მუშაობა არ შეჩერებულა და ახლაც ჩვეულებრივად მიმდინარეობს”, - ამბობს სოფელ უდეში მცხოვრები ლალი ყულჯანიშვილი.

ადგილობრივების თქმით, სამუშაოები ბოლო რამდენიმე დღის განმავლობაშიც გრძელდებოდა.

”გუშინწინ დიდი მილები აიტანეს ზემოთ, სადაც სათავეა და მუშაობა გრძელდება. სანამ არჩევნები ჩატარდებოდა, მანამდე დაიწყო სოფელში გაზის გაყვანა. ჯერ ცენტრალური მილები გაყავთ, მერე ალბათ სახლებში შეყვანა დაიწყება”, - ამბობს სოფელ უდის მკვიდრი ეკა თუმანიშვილი.

იგივეს ამბობს სოფელ არალში მცხოვრები მოსახლეობაც.

”სამუშაოები ახლაც მიმდინარეობს, სოფელს გაზი თუ ექნება უკეთესია. გაზი რომ შემოვა, ბუნება მეტად შინახება, ხალხი შეშას აღარ მოიხმარს და ტყე შენარჩუნდება”, - გვეუბნება სოფელ არალში მცოხვრები ფრიდონი ნადირაძე.

როდის უნდა დასრულდეს ადიგენის მუნიციპალიტეტში გაზიფიცირება, ადგილობრივებმა არ იციან. თუმცა, ამბობენ, რომ გაზი გაცილებით ეკონომიურია და არსებობის შემთხვევაში სოფელში ბევრი მოიხმარს.

”გაზი თუ იქნება სოფელში, უკეთესია, თითო კუბური მეტრი შეშა 70 ლარი ღირს. ჩვენ ახალციხეში ”კარმა” გვაქვს და თვეში ას ლარს ვიხდით. რომ გადავიანგარიშოთ, 400 ლარამდე უნდა გადავიხადო მთელი ზამთრის განმავლობაში, შეშა სულ ცოტა 600 ლარის მაინც გინდა. თავისთავად, გაზი უფრო ეკონომიურია”, - ამბობს სოფელ არლის მკვიდრი ოთარ აფრიამაშვილი.

საქართველოს გაზისა და ნავთობის კორპორაციის წარმომადგენელიწარმომადგენელი ალექსანდრე ხარებავა, რომელიც ადიგენში გაზიფიცირების პროცესს ხელმძღვანელობს, ამბობს, რომ სამუშაები მხოლოდ რამდენიმე დღის განმავლობაში იყო შეჩერებული და ამ ეტაპზე განახლებულია.

”მეორე თვეა, რაც სამუშაოები მიმდინარეობს. არჩევნებამდე ერთი თვე ვიმუშავეთ, არჩევნებზე წავედით თბილისში როგორც წესი, ხმის მისაცემად, მერე დავბრუნდით და გავაგრძელეთ მუშაობა. ათი დღე ვიყავით გაჩერებული. უნდა ჩამოვსულიყავით 4 -ში და ჩამოვედით 10-ში, ეგ არის და ეგ”, - განმარტავს ალექსანდრე ხარებავა და ამატებს, რომ ამ ეტაპზე არლისა და უდის ცენტრალური მაგისტრალი კეთდება, ხოლო შემდეგ შიდა დაქსელვა დაიწყება.

ადიგენის მუნიციპალიტეტის სოფლების გაზიფიცირებაზე გაზისა და ნავთობის კორპორაციის 14 თანამშრომელია დასაქმებული. გარდა ამ სოფლებისა, აღნიშნული კორპორაცია ამ ეტაპზე მსგვავს სამუშაოებს ახალციხის მუნიციპალიტეტის ქალაქ ვალეში აწარმოებს.

[თამარ თოთაძე, ადიგენი]