ეროვნული გამოცდების პირველი დღე დასრულდა

გამოცდის მეორე სესია 19:15 საათზე დასრულდა. დღის მეორე ნახევრაში გამოცდაზე დარეგისტრირებული 252 აბიტურიენტიდან 4 არ გამოცხადდა.

გამოცდიდან გამოსული აბიტურიენტების ნაწილი ამბობს, რომ ტესტირება რთული არ იყო და კარგ შედეგს ელიან, ნაწილს კი გამოცდა რთული მოეჩვენა.

„მომზადებული ვიყავი, მაგრამ მაინც ვფიქრობ, რომ მაღალ ქულებს ვერ ავიღებ, რადგან რთული იყო“, - გვითხრა კონსტანტინე დემეტრაძემ.

ახალციხის საგამოცდო ცენტრის ხელმძღვანელის გელა ინასარიძის განმარტებით, პირველმა საგამოცდო დღემ მშვიდ ვითარებაში ჩაიარა.

ახალციხის საგამოცდო ცენტრი მეხუთე საჯარო სკოლაშია განთავსებული. სკოლის ტერიტორიაზე მთელი დღის განმავლობაში მობილიზებული იყო საპატრულო და სასწრაფო–სამედიცინო დახმარების სამსახურები.

შეგახსენებთ, რომ ერთიანი ეროვნული გამოცდები დღეიდან, 1 ივლისიდან, ქართული ენისა და ლიტერატურის გამოცდით დაიწყო. ეროვნული გამოცდები ხვალ, 2 ივლისს, კვლავ ქართული ენისა და ლიტერატურის გამოცდით გაგრძელდება. გამოცდა ხვალაც ორ სესიად გაიმართება.

ახალციხის საგამოცდო ცენტრში 1000–მდე აბიტურიენტია დარეგისტრირებული. ქვეყნის მასშტაბით კი ეროვნულ გამოცდებს 38 500–ზე მეტი სკოლადამთავრებული აბარებს.

[ლუბა გიორგაძე, ახალციხე]