ქართულის გამოცდის პირველ სესიაზე ახალციხეში 6 აბიტურიენტი არ გამოცხადდა

ქართული ენისა და ლიტერატურის გამოცდის მეორე სესია, ახალციხის საგამოცდო ცენტრში უკვე დაიწყო. რამდენი აბიტურიენტი გამოცხადდა და რამდენმა ვერ შეძლო გამოცდებში მონაწილეობა, ახალციხის საგამოცდო ცენტრში ამაზე ჯერ ვერ საუბრობენ. მეორე სესია, ოთხი საათი და 15 წუთი გაგრძელდება. საგამოცდო პროცესი 19:15 საათზე დასრულდება.

„ახლა შევდივარ გამოცდაზე, იმედი მაქვს რთული ტესტები არ შემხვდება და იოლად ჩავაბარებ, ცოტა ვნერვიულობ, მაგრამ კარგი განწყობა მაქვს“, - გვითხრა თამარ პაპიაშვილმა, რომელმაც რეგისტრაცია მეორე სესიაზე გაიარა.

ქართული ენისა და ლიტერატურის გამოცდის პირველი სესია დილის 09:00 საათიდან დაიწყო და 12:15 საათისათვის დასრულდა.

ახალციხის საგამოცდო ცენტრში აცხადებენ, რომ პროცესმა მშვიდ ვითარებაში ჩაიარა.

„რაიმე ექსცესებს ადგილი არ ჰქონია“, - განაცხადა ახალციხის საგამოცდო ცენტრის ხელმძღვანელმა გელა ინასარიძემ.

ახალციხის საგამოცდო ცენტრი მეხუთე საჯარო სკოლაშია განლაგებული. სკოლის ტერიტორიაზე მთელი დღის განმავლობაში მობილიზებულია საპატრულო და სასწრაფო სამედიცინო დახმარების სამსახურები.

შეგახსებნებთ, რომ ერთიანი ეროვნული გამოცდები დღეიდან, 1 ივლისიდან ქართული ენისა და ლიტერატურის გამოცდით დაიწყო.
აბიტურიენტებმა, 80 ქულიან ტესტები უნდა შეავსონ. გამოცდის მინიმალური ბარიერი 21 ქულაა. წერითი დავალების გარდა, აბიტურიენტებს გარკვეული საკითხების ჩაბარება ელექტრონულადაც მოუწიათ. მათ მაგიდებზე სპეციალური ლეპტოპები დახვდათ.

ქართული ენისა და ლიტერატურის გამოცდა ორი დღის განმავლობაში გაგრძელდება. 4–5 ივლისს კი აბიტურიენტები ზოგად უნარებს ჩაბარებენ.

შეგახსენებთ, რომ ქალაქ ახალციხის საგამოცდო ცენტრში 1000–მდე აბიტურიენტია დარეგისტრირებული. ქვეყნის მასშტაბით კი ეროვნულ გამოცდებს 38 500–ზე მეტი სკოლადამთავრებული აბარებს.

[ლუბა გიორგაძე, ახალციხე]