ქართული ენისა და ლიტერატურის გამოცდა დასრულდა

2 ივლისს, ახალციხის საგამოცდო ცენტრში, ქართული ენისა და ლიტერატურის გამოცდის პირველ სესიაზე 222 აბიტურიენტი იყო დარეგისტრირებული, თუმცა გამოცდაზე 9 მათგანი არ გამოცხადდა.

აბიტურიენტების არასრული რაოდენობა გავიდა ტესტირებაზე დღის მეორე ნახევარშიც. მეორე სესიაზე დარეგისტრირებული 224 აბიტურიენტიდან, 5 მათგანი გამოცდაზე არ მივიდა.

როგორც საგამოცდო ცენტრის ხელმძღვანელი, გელა ინასარიძე განმარტავს, ორივე სესიამ მშვიდ ვითარებაში ჩაიარა.

ერთიანი ეროვნული გამოცდები 4 ივლისს, ზოგადი უნარების ტესტირებით გაგრძელდება. რომლის დროსაც, აბიტურიენტებს ვერბალური და მათემატიკური ნაწილის ჩაბარება მოუწევთ. თითოეულისათვის დრო 1 საათი და 35 წუთია. ამ ხნის განმავლობაში, მათ 80 ქულიანი ტესტი უნდა გააკეთონ. ზოგადი უნარების მინიმალური ბარიერი 24 ქულაა.

[თაკო ფეიქრიშვილი, ახალციხე]