ქართული ენისა და ლიტერატურის გამოცდაზე 5 აბიტურიენტი არ გამოცხადდა

აბიტურიენტებისათვის ერთიანი ეროვნული გამოცდები ქართული ენისა და ლიტერატურის საგნის ჩაბარებით დაიწყო.

პირველი სესიაზე გამოცდაზე რეგისტრაცია დილის 08:00 საათზე დაიწყო. როგორც ახალციხის საგამოცდო ცენტრში ამბობენ, რეგისტრირებული 229 აბიტურიენტიდან სამი არ გამოცხადდა.

რაც შეეხება მეორე სესიას, რომელზე რეგისტრაციაც 14:00 საათზე დაიწყო, რეგისტრირებული 240 აბიტურიენტიდან გამოცდაზე ორი არ მივიდა.

ახალციხის საგამოცდო ცენტრის კოორდინატორის გელა ინასარიძის თქმით, ქართული ენისა და ლიტერატურის გამოცდამ ორივე სესიაზე მშვიდ ვითარებაში ჩაიარა.

ახალციხის საგამოცდო ცენტრის ახალციხის მეხუთე საჯარო სკოლაშია განთავსებული, აქ მთელი დღის განმავლობაში მობილიზებულნი იყო საპატრულო პოლიცია და სასწრაფო სამედიცინო დახმარების ჯგუფი. საგამოცდო საათებში გადაკეტილი იყო მეხუთე საჯარო სკოლის მიმდებარე ტერიტორიაზე საავტომობილო გზებიც.

შეგახსენებთ, რომ მთელი ქვეყნის მასშტაბით 2017 წლის ერთიანი ეროვნული გამოცდები დღეიდან 3 ივლისიდან დაიწყო და 27 ივლისს დასრულდება.

აბიტურიენტები ხვალ, 4 ივლისს გამოცდას ისევ, ქართულ ენასა და ლიტერატურაში ორ სესიად ჩააბარებენ.

[ლუბა გიორგაძე, ახალციხე]