ახალციხეში 5 წლის ბავშვს ავტომანქანა დაეჯახა

ავტოსაგზაო შემთხვევა დღეს, 1 ივლისს დაახლოებით, 16:00 საათზე მოხდა. როგორც თვითმხილველები ამბობენ, „მიცუბიშის“ მარკის მსუბუქი ავტომობილის მძღოლმა მანქანა გადამსვლელ, ორ ქალბატონს ააცილა და მოზარდს დაეჯახა. დაშავებული ახალციხის „რეფერალურ ჰოსპიტალში“ თავად ავტომობილის მძღოლმა გადაიყვანა.

როგორც სამედიცინო დაწესებულებაში განგვიმარტეს, 5 წლის ბავშვს დაზიანებები არ აღენიშნება, თუმცა ექიმების მეთვალყურეობის ქვეშ საღამომდე დარჩება.

„დაზიანებები და მოტეხილობები არ აქვს, შეშინებულია, ამიტომ ორი საათი კიდევ დავტოვებთ“, - გვითხრეს ახალციხის „რეფერალურ ჰოსპიტალში“.

ავტოსაგზაო შემთხვევის თვითმხილველები ამბობენ, რომ მომხდარი მძღოლის ბრალი არ იყო, ვინაიდან, ქუჩა, სადაც შემთხვევა მოხდა, გადატვირთულია: "მეზობელ ქუჩაზე სამშენებლო სამუშაოები მიმდინარეობს, ტროტუარი მანქანებით იყო სავსე, იქვე სამშენებლო მასალა ეყარა და ნაგვის ურნაც ისე იდგა, რომ ჩვენც ძლივს გამოვიარეთ. სწორედ ამ დროს, ჩვენ აგვაცილა და ბავშვმა გადაურბინა. საერთოდ, ქალაქის ბევრი ქუჩაა ისე გადატვირთული, რომ გავლა შეუძლებელია".

საქართველოს შინაგან საქმეთა სამინისტროს ინფორმაციით, მომხდარზე ძიება სსკ-ს 276-ე მუხლის 1-ლი ნაწილით მიმდინარეობს. აღნიშნული ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.

[ლუბა გიორგაძე, ახალციხე]