მძღოლმა, რომელიც აწყურში მოზარდს დაეჯახა, დაშავებული მიატოვა

ავარიის შედეგად დაშავებულის ოჯახის წევრები ამბობენ, რომ მძღოლი, რომელიც მოზარს დაეჯახა, შემთხვევის ადგილიდან მიიმალა. მათი განმარტებით, შეჯახებისას, მოზარდი დაეცა და გონება დაკარგა, ამიტომ მანქანის მარკა არ ახსოვს.

ამ დრომდე, მათ ავტომანქანის მძღოლი არ დაკავშირებიათ. შინაგან საქმეთა სამინისტროში კი "სამხრეთის კარიბჭესთან" აცხადებენ, რომ მძღოლი პოლიციაში დღეს, 4 ნოემბერს თავად "გამოცხადდა და კითხავენ".

15 წლის მოზარდს ქვედა კიდურის მოტეხილობა აქვს და ახალციხის სამედიცინო დაწესებულებაში რჩება: "ფეხის მოტეხილობა აქვს მხოლოდ. მდგომარეობა სტაბილურია, მაგრამ ორი დღის განმავლობაში მაინც უნდა დარჩეს საავადმყოფოში, რადგან დავაკვირდეთ. ამ მდგომარეობით, სხვა რაიმე სახის დაზიანება არ აღენიშნება".

შეგახსენებთ, რომ შემთხვევა გუშინ, 3 ნოემბერს სოფელ აწყურში, სკოლის მიმდებარე ტერიტორიასთან მოხდა. 15 წლის ბიჭი მაღაზიიდან სახლში ბრუნდებოდა, როცა მას ავტომანქანა შეეჯახა.

საქმეზე მიმდინარეობს გამოძება სსკ–ის 276-ე მუხლის პირველი ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

[თაკო ფეიქრიშვილი, ახალციხე]