აწყურში მოზარდს ავტომანქანა შეეჯახა

შემთხვევა დღეს, 3 ნოემბერს, დაახლოებით 18:30 საათზე მოხდა. ავტომანქანა ქვეითად მოსიარულეს შეეჯახა, რის გამოც, მოზარდს ქვედა კიდური დაუზიანდა.

ადგილზე სასწრაფო–სამედიცინო სამსახურის ბრიგადა მივიდა. პირველადი დახმარების აღმოჩენის შემდეგ ეკიპაჟმა დაზარალებული ახალციხის რეფერალურ ჰოსპიტალში გადაიყვანა.

სამედიცინო დაწესებულებაში განმარტავენ, რომ პაციენტის მდგომარეობა სტაბილურია – "მას ფეხის მოტეხილობა აღენიშნება, დილამდე დაკვირვების ქვეშ, ჩვენთან დარჩება. ამ დროისათვის, გამოკვლევები ჩატარებულია და კიდევ გრძელდება".

შსს–ს ინფორმაციით, მომხდარზე ძიება სსკ–ის 276-ე მუხლის პირველი ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

[თაკო ფეიქრიშვილი, ახალციხე]