ქვეითად მოსიარულე 13 წლის გოგონას ავტომანქანა დაეჯახა

ავტოსაგზაო შემთხვევა 9 აპრილის ქუჩაზე, დაახლოებით ერთი საათის წინ, 21:00 საათზე მოხდა.

„112–ზე შემოვიდა შეტყობინება ავარიის შესახებ, თუმცა, მალევე გაუქმდა“, – ამბობენ სასწრაფო–სამედიცინო დახმარების სამსახურში.
მათივე განმარტებით, დაშავებული საავადმყოფოში თავად ავტომობილის მძღოლმა გადაიყვანა.

„გოგინა გზაზე გადმოდიოდა, საპირისპირო მიმართულებით გაიხედა, გაჩერდა, აღარ მეგონა გზას თუ გააგრძელებდა, მაგრამ უცებ გააგრძელა და ამ დროს დავეჯახე“, – ამბობს ავტომობილის მძღოლი, რომელსაც „სამხრეთის კარიბჭე“ „უნიმედი სამცხე – ახალციხის ჰოსპიტალში“ ესაუბრა.

დაშავებული საავადმყოფოდან უკვე გაწერეს. ჰოსპიტალში ამბობენ, რომ პაციენტს მსუბუქი დაზიანებები აქვს.

„ბავშვი შეშინებულია, ღვთის წყალობით, ისეთი არაფერია“, – გვითხრა გოგონას დედამ.

ამ წუთებში საავადმყოფოს ეზოში სამართალდამცველები ავტომანქანას „დათვალიერებას უტარებენ“.

საქართველოს შინაგან საქმეთა სამინისტროს ინფორმაციით, მომხდარზე ძიება სსკ–ის 276 მუხლის პირველი ნაწილთ დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.





[sknews.ge]