ახალციხის ციხეზე სპორტული ღონისძიებები მიმდინარეობს

11:30 საათიდან ახალციხის ციხეზე დაიწყო შეჯიბრი ჭიდაობაში. საქართველოს პირველობისთვის სპორტსმენები ერთმანეთს 50, 60, 70, 80 და 90 კილოგრამ წონით კატეგორიებში შეეჯიბრნენ.

ქართული ჭიდაობის ეროვნული ფედერაციის პრეზიდენტის გოჩა პარუნაშვილის თქმით, შეჯიბრში საქართველოს სხვადასხვა ქალაქებიდან ჩამოსული სპორტსმენებიც მონაწილეობენ.

ჭიდაობის პარალელურად, 12:00 საათიდან, ციხეზე დაიწყო შეჯიბრი ნარდში, რომელიც 3 ეტაპად გაიმართა. შეჯიბრს სასპორტო სკოლის დირექტორი გრიგოლ ტაბატაძე ხელმძღვანელობდა. ნარდის ჩემპიონატში 16 მონაწილე ჩაერთო.

ასევე 16 მონაწილე იყო ჭადრაკის ტურნირში, რომელიც 13:00 საათზე დაიწყო.

„ჭადრაკის შეჯიბრი ტარდებოდა ოლიმპიური სისტემით, საიდანაც, საბოლოოდ, 3 გამარჯვებული გამოვლინდა. გამარჯვებულები ფულადი და ფასიანი საჩუქრებით დაჯილდოვდებიან“, – ამბობს სამცხე–ჯავახეთის ჭადრაკის ფერაციის ხელმძღვანელი შაქრო დიდიმამიშვილი.

15:00 საათიდან სპორტულ ღონისძიებებს მკლავჭიდის შეჯიბრება დაემატა. ამ ტურნირშიც 3 გამარჯვებული გამოვლინდა.

სპორტულ ღონისძიებებში გამარჯვებულები საღამოს, 19:00 საათზე დაჯილდოვდებიან.

გარდა სპორტული ღონისძიებებისა, ციხეზე მოეწყო ქართული რეწვის ნიმუშებისა და ქართული სამზარეულოს გამოფენა – გაყიდვა.
თავიანთი ნამუშევრები გამოფინეს ციხეზე ადგილობრივმა ახალგაზრდა გამომგონებლებმა: კარლო ხუციშვილმა, ირაკლი კაპანაძემ და შაკო გიორგაძემ.

ციხეზე დილიდან იმყოფებოდნენ სამხარეო ადმინისტრაციისა და ადგილობრივი ხელისუფლების წარმომადგენლები და სასულიერო პირები.

„სულ 3 ქალაქს ჰყავს თავის სახელობის წმინდანი: მცხეთას–ევსტათე მცხეთელი, თბილისს– აბო თბილელი, ახალციხეს კი შალვა ახალციხელი. ეს დღე მნიშვნელოვანია იმითაც, რომ ეს დღესასწაული არის სახალხო და მთელი ქალაქი ზეიმობს მას“, – განაცხადა ახალციხის მერმა გიორგი კოპაძემ.

ახალციხელობის აღნიშვნა ქალაქში 09:00 საათიდან დაიწყო. დღესასწაული 20:00 საათზე, გალა–კონცერტითა და ფეიერვერკით დასრულდება.
ღონისძიებისთვის მერიამ 24.000 ლარი გამოყო.

[ელისაბედ მოდებაძე, ნანა მიქელაძე, ახალციხე]