'ახალციხელობის' 21–ე ზეიმი დასრულდა

წელს, ქალაქმა, სახელობითი დღესასწაული 21–ედ იზეიმა; ქალაქს კი კიდევ სამი საპატიო ახალციხელი შეემატა და ახლა ამ სტატუსს 13 მოქალაქე ატარებს, 10 კაცი და 3 ქალი.

შეგახსენებთ, ახალციხეში, სახელობითი დღესასწაული პირველად 1995 წელს აღინიშნა. მაშინ ქალაქში სახალხო ზეიმი შემოდგომით, ოქტომბერში იმართებოდა. ეწყობოდა კონცერტები, სიმღერისა და ცეკვის ანსამბლების მონაწილეობით. ზეიმი ახალციხის ცენტრში, მესხეთის თეატრის მიმდებარე ტერიტორიაზე, კულტურის სამსახურის ორგანიზებით ტარდებოდა.

2004 წლიდან, „ახალციხელობის“ დღესაწაულმა ახალციხის ციხის ტერიტორიაზე, მუზეუმთან გადაინაცვლა. მაშინდელი პრეზიდენტის რწმუნებულის აპარატისა და გამგეობის კულტურის სამსახურის ინიციატივით, დღესასწაულის აღნიშვნის უცვლელ თარიღად 30 ივნისი, შალვა ახალციხელის ხსენების დღე დადგინდა.

ამავე წელს, ღონისძიების დროს, პირველად, ახალციხის, ტაო-კლარჯეთისა და ლაზეთის ეპისკოპოსს მეუფე თეოდორეს ახალციხის საპატიო მოქალაქის წოდება მიენიჭა.

„საპატიო მოქალაქის“ სტატუსის მინიჭების ტრადიცია ახალციხეში 2013 წელს, ახალციხის მუნიციპალიტეტის საკრებულოს მაშინდელი თავმჯდომარის, ოლეგ სანდროშვილის ინიციატივით აღდგა. 2004 წლიდან დღემდე ქალაქს 10 საპატიო ახალციხელი ჰყავს.

აქვე შეგახსენებთ, ახალციხელობის“ აღნიშვნა დღეს 14:00 საათიდან დაიწყო.ციხის ტერიტორიაზე ხალხური რეწვის ნიმუშები, ხელნაკეთი სამკაულები, ახალციხის სამხატვრო სკოლის ნამუშევრები, ფოტოსტუდია S & S–ის ფოტოები და მესხური სამზარეულოს კერძები გამოიფინა. პარალელურად, მიმდინარეობდა სხვადასხვა სპორტული შეჯიბრებები, მოეწყო ველორბოლა. საღამო კი კონცერტებით გაგრძელდა.

[ნინო ნარიმანიშვილი, ახალციხე]