ახალციხის ქვედა ციხის მიმდებარე ტერიტორიაზე გამოფენები 14:00 საათზე გაიხსნა. დამთვალიერებელს ხალხური რეწვის ნიმუშებისა და ხელნაკეთი სამკაულების, ასევე, ახალციხის სამხატვრო სკოლის ნამუშევრების დათვალიერება შეუძლია.
„ამ ხალიჩებს ჩემი შვილი ქსოვს, ჩვენ ამ ღონისძიებაში ახლა ჩავერთეთ. ხალიჩებს არ ვყიდით“, – გვეუბნება ხალხური რეწვის ნიმუშების გამოფენის ერთ–ერთი მონაილე მარიამ ბებნაძე, რომელიც ამ გამოფენისთვის ვალედან ჩამოვიდა.
ხალიჩებისგან განსხვავებით, სხვადასხვა ხელნაკეთი ნივთებისა და სამკაუელბის ავტორები ამბობენ, რომ ისინი თავიანთ ნაწარმს ყიდიან კიდეც.
სამხატვრო სკოლის ხელმძღვანელი ნანა ნათენაძე ამბობს, რომ ამ გამოფენისთვის სპეციალურად მოემზადა: „გამოფენაზე წარმოდგენილი გვაქვს ზეთში შესრულებული ტილოები, თექაზე შესრულებული, კერამიკის ყვავილებით გაწყობილი პანოს პეიზაჟი; აგრეთვე წარმოდგენილია რელიგიური თემატიკა. ეს ყვეალფერი დღევანდელი დღისთვის სპეციალურად შევარჩიეთ“.
ამ გამოფენების პარალელურად, ციხეში გამოფენილია ფოტოსტუდია S & S–ის ფოტონამუშევრები. დამთვალიერებელს სტუდია ფოტოგადაღებასაც სთავაზობს.
ხალხური რეწვისა და სამხატვრო სკოლების ნამუშევრების გამოფენასთან ერთად , ახალციხის ციხეში მესხური კულინარული კერძებია გამოფენილი. მსურველებს მესხური თაფლის, ჩეჩილი ყველისა და სულგუნისა და არყის შეძენა და დაგემოვნება შეუძლიათ.
ამავე დროს, ქვედა ციხის ტერიტორიაზე სპორტული ღონისძიებებიც მიმდინარეობს. სხვადასხვა ასაკის მონაწილეები ერთმანეთს ჭადრაკში, ნარდში, მკლავჭიდსა და ჭიდაობაში ეჯიბრებიან.
„ახალციხელობის“ დღესასწაულზე დაგეგმილი ღონისძიებების ორგანიზატორი ახალციხის მერიაა. გამოფენებიც და სპორტული ღონისძიებებიც დღის ბოლომდე გაგრძელდება.
საღამოს, 18:00 საათზე, დღესასწაული კონცერტით გაგრძელდება, რომელშიც ადგილობრივი ქორეოგრაფიული და ფოლკლორული ანსამბლები მიირებენ მონაწილეობას. სწორედ ამ კონცერტის დასრულების შემდეგ დააჯილდოვებენ სპორტულ ღონისძიებებში გამარჯვებულებს.
დღესასწაული გალა–კონცერტით დასრულდება, რომელიც საქართველოს კულტურის სამინისტროს ორგანიზებით ეწყობა. „ახალციხელობას“ ფეიერვერკი დაასრულებს.
შეგახსენებთ, ახალციხელობის აღნიშვნა თითქმის ორი ათეული წლის წინ დაიწყო. ახალციხეში, სახელობითი დღესასწაული პირველად 1995 წელს აღინიშნა. მაშინ ქალაქში სახალხო ზეიმი შემოდგომით, ოქტომბერში იმართებოდა. ეწყობოდა კონცერტები, სიმღერისა და ცეკვის ანსამბლების მონაწილეობით. ზეიმი ახალციხის ცენტრში, მესხეთის თეატრის მიმდებარე ტერიტორიაზე, კულტურის სამსახურის ორგანიზებით ტარდებოდა.
2004 წლიდან, „ახალციხელობის“ დღესაწაულმა ახალციხის ციხის ტერიტორიაზე, მუზეუმთან გადაინაცვლა. მაშინდელი პრეზიდენტის რწმუნებულის აპარატისა და გამგეობის კულტურის სამსახურის ინიციატივით, დღესასწაულის აღნიშვნის უცვლელ თარიღად 30 ივნისი, შალვა ახალციხელის ხსენების დღე დადგინდა. ამავე წელს, ღონისძიების დროს, პირველად, ახალციხის, ტაო-კლარჯეთისა და ლაზეთის ეპისკოპოსს მეუფე თეოდორეს ახალციხის საპატიო მოქალაქის წოდება მიენიჭა.
„საპატიო მოქალაქის“ სტატუსის მინიჭების ტრადიცია ახალციხეში 2013 წელს, ახალციხის მუნიციპალიტეტის საკრებულოს მაშინდელი თავმჯდომარის, ოლეგ სანდროშვილის ინიციატივით აღდგა.
ეს სტატუსი ახალციხეშ უკვე 10 მოქალაქეს აქვს. წელს კიდევ სამ საპატიო მოქალაქეს აირჩევენ. 2016 წლის ახალციხის სამი საპატიო მოქალაქის ვინაობა დღეს, დღის ბოლოს გასაჯაროვდება.
[ნათია გულიაშვილი, სოფო ღვინიაშვილი, მარიამ ბარძიმაძე, ახალციხე]