უფასო სახელმძღვანელოები ყველას არ შეხვდა

საქართველოს განათლებისა და მეცნიერების სამინისტრო სოციალურად დაუცველი და მრავალშვილიანი ოჯახების მოსწავლეებს უფასო სახელმძღვანელოებს დაპირდა. თუმცა ამ კატეგორიაში მოხვედრილ ყველა მოსწავლეს წიგნები უფასოდ არ ერგო. სამმა მრავალშვილიანმა ოჯახმა, რომელთა ბავშვებიც სოფელ ბუღაშენის სკოლაში სწავლობენ, წელს წიგნები უფასოდ ვერ მიიღეს.

„სამი შვილი მყავს. უფასო სახელმძღვანელოები მხოლოდ ერთს მისცეს, არადა ამბობდნენ, რომ სამივეს დაურიგებდნენ. წიგნები ვიყიდე. ყოველდღე მოდიან, ხან 10 ლარი მოგვეცი, ხან 16 ლარი. საკმაოდ ბევრ საგანს სწავლობენ. უფასო წიგნები არ მისცეს ჩემს მე–8 და მე–12 კლასელ შვილებს. ჩემი შემოსავლის წყარო მხოლოდ კარტოფილია და იმასაც ვერ ვყიდი. ჩვენს ოჯახს სხვა შემოსავალი არ გააჩნია“, – ამბობს მეხაკ აზოპიანი.

სახელმძღვანელოების ფასი 6-დან 18 ლარამდე მერყეობს. წიგნების ფასი განსაკუთრებით მძიმედ იმ ოჯახებზე ისახება, ვისაც რამდენიმე მოსწავლე ჰყავს.

ნუნე აპოზიანის შვილები მე-3, მე-5 და მე-7 კლასებში სწავლობენ. არცერთ მათგანს ჯერ სახელმძღვანელო არ აქვს.

„წიგნებს დაგვპირდნენ, მაგრამ არ მოგვცეს. ჩემს შვილებს ეკუთვნოდათ. ახლა სკოლაში სამივე უწიგნოდ დადის. სხვა ბავშვებისგან იწერენ და ისე სწავლობენ. არადა კარგი მოსწავლეები არიან“, – ამბობს ნუნე აპოზიანი.

ბუღაშენის სკოლაში სახელმძღვანელოების გარეშე რამდენიმე პედაგოგიც დარჩა.

ელიზავეტა გალოიანი ბიოლოგიის პედაგოგია.

„ბიოლოგია რთული საგანია, მაგრამ წიგნი არ გვაქვს. მქონდა საჩივარი, მაგრამ ვერაფერს გავხდი. სკოლაში მე-9, მე-10 და მე-12 კლასებში სახელმძღვანელოები არ არის. თანახმა ვარ, რომ მომცენ წიგნი, რომელშიც ნახევარი ტექსტი ქართულად იქნება, ნახევარი კი სომხურ ენაზე. თუნდაც ქართულად იყოს, რომ ვიცოდე, რა პროგრამით ვასწავლო ბავშვებს, რა უნდა გავიაროთ“, – ამბობს იგი.

ბუღაშენის სკოლის დირექტორი თადევოს ფალიანი ამბობს, რომ განაცხადი ივნისში გააკეთეს: „სოციალურად დაუცველი ოჯახებიდან წიგნები უფასოდ ოთხმა ბავშვმა მიიღო, მრავალშვილიანი ოჯახებიდან კი მხოლოდ ერთმა მოსწავლემ. დაგვპირდნენ, რომ მრავალშვილიანი ოჯახების ბავშვებსაც უფასოდ მისცემდნენ სახელმძღვანელოებს, მაგრამ არ გააკეთეს. რესურს ცენტრში მითხრეს, რომ წიგნები თბილისიდან არ გამოუგზავნიათ“.

ახალქალაქის რესურს ცენტრის დირექტორის ნარცის კარაპეტიანის თქმით, შესაძლებლობის ფარგლებში წიგნები ყველას დაურიგეს. თუ ვინმემ ვერ მიიღო, შესაძლოა იმის ბრალიც იყოს, რომ სკოლის დირექტორმა სახელმძღვანელოების საჭიროების შესახებ მონაცემები ბაზაში დაგვიანებით შეიტანა, ან სოციალური უზრუნველყოფის სამსახურმა დროულად არ მიაწოდა შესაბამისი დოკუმენტები.

რესურს ცენტრში ვერ მოგვაწოდეს მონაცემი, რა რაოდენობით წიგნი მიიღო ახალქალაქის მუნიციპალიტეტმა სოციალურად დაუცველი და მრავალშვილიანი ოჯახების მოსწავლეების დასახმარებლად.

[შუშან შირინიანი, ახალქალაქი]