შეძლებული ოჯახების მოსწავლეები უფასო სახელმძღვანელოებსა და კომპიუტერებს ისევ მიიღებენ

”როგორც ჩანს, არავის მოეწონა ჩემი ეს მოსაზრება და ამიტომ ეს არ მოხდება, თანაც, ძალიან ცოტაა ასეთი ოჯახი. ეკონომიას ვერაფერს მივიღებთ და ტყუილა, შევაწუხებთ ხალხს”, - განმარტა დღეს, ჟურნალისტებთან შეხვედრაზე, საქართველოს განათლების მინისტრმა ალექსანდრე ჯეჯელავამ.

მისივე ინფორმაციით, მომავალ წელს მოსწავლეები უფასო სახელმძღვანელოებს მიიღებენ და შესაბამისი თანხა სახელმწიფო ბიუჯეტში გათვალისწინებულია.

ინიციატივა, სახელმძღვანელოები უფასო ყველასთვის არ ყოფილიყო, მინისტრმა აგვისტოში გააჟღერა.

”მე გამოვთქვი ინიციატივა, რომ მომავალ წლებში სასკოლო სახელმძღვანელოებით და პირველ კლასელების კომპიუტერებით შესაძლოა აღარ დავეხმაროთ შეძლებულ ოჯახებს, ვისაც შედარებით მაღალი შემოსავალი აქვს, 40 000 ლარი ვთქვით ქონების დეკლარაციაზე დაყრდნობით. მე მომხრე ვარ, რომ ჩემს შვილებს საჩუქრად წიგნები არ უნდა ეკუთვნოდეთ და საშუალება გვაქვს ჩემი, ჩემი ოჯახის სამსახურიდან გამომდინარე ეს სახელმძღვანელოები შევიძინოთ. ამ მიმრთულებით მუშაობას ვაპირებ, ეს წესი წელს არ ამოქმედდება, მაგრამ იმედი მაქვს, მომავალი წლიდან ასეთი საშუალება გვექნება”, - აცხადებდა ალექსანდრე ჯეჯელავა.

[sknews.ge]