ახალციხეში უფასო სახელმძღვანელოები ყველას არ შეხვდა

ახალციხის საგანმანათლებლო რესურსცენტრში წიგნების ნაკლებობას მოსწავლეების მობილობით ხსნიან.

„სახელმძღვანელოების ნაკლებობა ნამდვილად არის, ეს მობილობის შედეგია,როდესაც მოსწავლე ერთი მუნიციპალიტეტიდან სხვა მუნიციპალიტეტში გადადის. მონაცემები გადაგზავნილია და წიგნები დაახლოებით ერთ კვირაში ჩამოვა. ზუსტ რაოდენობას, რამდენი სახელმძღვანელო აკლია, ვერ გეტყვით, ზოგან შეიძლება წიგინი არ იყოს საკმარისი, ზოგან კი რვეული“,- ამბობს ახალციხის რესურცენტრის უფროსის მოავლეობის დროებითი შემსრულებელი დიანა ინასარიძე.

რამდენ მოსწავლეს გადაეცა უფასო სახელმძღვანელო, ახალციხის რესურსცენტრში ინფორმაცია არ აქვთ.

მუნიციპალიტეტის მასშტაბით სასკოლო წიგნების დარიგება სწავლის დაწყებამდე ერთი კვირით ადრე დაიწყო. სახელმძღვანელოს დაზიანების შემთხვევაში მშობელს ახლის ყიდვა მოუწევს.

„წლის ბოლოს დირექტორი სახელმძღვანელოს სპეციალურად შედგენილი ქულებით შეაფასებს. ამის შემდეგ გადაწყდება მშობელს მოუწევს თუ არა ახალი სახელმძღვანელოს ყიდვა“,-ამბობს დიანა ინასარიძე.

[თინათინ ზაზაძე, ახალციხე]