უფასო წიგნები - შეფასებები ახალციხიდან

საქართველოს განათლებისა და მეცნიერების სამინისტროს გადაწყვეტილებით 2013-2014 სასწავლო წლისათვის მთელი საქართველოს მასშტაბით 2084 საჯარო სკოლის 650 000 ათასი მოსწავლე სასკოლო სახელმძღვანელოებს უფასოდ მიიღებს. ამ სიახლეს ახლციხის საჯარო სკოლების მოსწავლეები, პედაგოგები და მშობლები მიესალმებიან.

”რა თქმა უნდა ეს არ არის ცუდი სიახლე, პირიქით ძალიან კარგია, მაგრამ შეიძლება ერთი პრობლემა გაჩნდეს, რამდენად გაუფრთხილდება მოსწავლე ნაჩუქარ სახელმძღვანელოს. ეს წიგნი შემდეგ სკოლას რჩება და კარგი იქნება ამაზე რაღაც კონტროლი თუ დაწესდება”, - ამბობს მეექვსე საჯარო სკოლის პედგოგი ეკა დალალიშვილი.

სკოლის მოსწავლეების თქმით, უფასო სახელმძღვანელოების დარიგება მათი ოჯახების ფინანსურ მდგომარეობას შეუწყობს ხელს.

”ეს ინიციატივა, როგორც ეკონომიკურ მდგომარეობას შუწყობს ხელს, ასევე, სასწავლო პროცესის დროულად დაწყებასაც. თითქმის ყოველ წელს, სწავლას რომ ვიწყებთ ბავშვებს წიგნები ერთი თვე არ აქვთ”, - მეექვსე საჯარო სკოლის მოსწავლე ქეთევან ჩილინგარაშვილი.

განათლებისა და მეცნიერების მინისტრის განცხადებით ამ ეტაპზე უფასო სახელმძღვანელოები მხოლოდ საჯარი სკოლის მოსწავლეებს გადაეცემათ. ეს სიახლე კერძო სკოლებს არ ეხება .

ახალციხის კერძო სკოლის ”მზექას” დირექტორის ბელა კაპანაძის თქმით საჯარო სკოლისა და კერძო სკოლის ასე გამორჩევა არ შეიძლება. უფასო სახელმძღვანელოები ყველა მოსწავლესთვის უნდა იყოს.

”სახელმწიფომ შეიძლება კერძო სკოლას რემონტის თანხა არ გადაუხადოს, მაგრამ უფასო სახელმძრვანელოებისგან კერძო სკოლის მოსწავლეები არ უნდა გამოყონ, ამ მხრივ არ უნდა მოხდეს მათი დისკრიმინაცია. გაიჟღერა, რომ კერძო სკოლებში უფასო სახელმძღვანელოების დარიგება პირველ ეტაპზე არ ხდება, ალბათ განათლების მინისტრი გაითვალისწინებს კერძო სკოლის მოსწავლეებსაც”, - ამბობს ბელა კაპანაძე.

ახალციხის პირველი საჯარო სკოლის დირექტორის მაკა ჯანაშვილის თქმით, მას ესმის სახელმწიფოს განცხადება, რომ კერძო სკოლებს არ აფინანსებენ უფასო სახელმღვანელოებით.

”ვისაც ბავშვი კერძო სკოლაში დაჰყავს, იმის საშუალება აქვს, რომ თანხა გადაუხადოს. კერძო სკოლა ასევე ბავშვებზე ვაუჩერსაც იღებს, ამიტომ ისინი უნდა უზრუნველყოფდნენ წიგნებით აქედან გამომდინარე ალბათ განათლების სამინისტრომ ჩათვალა, რომ ამ ეტაპზე მათ არ დაუფინანსოს სახელმძღვანელოები”, - ამბობოს მაკა ჯანაშვილი.

ამ სიახლემ გამომცემლების უკმყოფილება გამოიწვია, მათი განცხადებით ახალი ინიციატივის გამო დაზარალდებიან. ახალციხეში კი ფიქრობენ, რომ მათ ისეთი წიგნები უნდა ბეჭდონ რომელიც საზოგადოებას დააინტერესებს.

”ეს სიახლე მისაღებია, ის მოსაზრება, რომ ვინმე ზარალდება არასწორია, გამომცემლებმა ბეჭდონ ის წიგნები, რომლებიც მათ სარგებელს მოუტანს და არ დაზარალდებიან. ასეთი სიახლესთვის ხელის შეშლა მიუღებელია”, - ამბობს ახალციხეში მცხოვრები ნაირა სამსონიძე.

[ნუკა სტეფნაძე, ახალციხე]