სამმაგი ხარჯი სასკოლო წიგნებისთვის

სირანუშ ესოიანი ორი უმცროსკლასელი მოსწავლის დედაა. სასკოლო წიგნები სასწავლო წლის დასაწყისშივე შეიძინა. აქედან, უმცროსი ვაჟის წიგნები სულ რაღაც 25 ლარი დაუჯდა. რამდენიმე დღის წინ კი სკოლებში განუცხადეს, რომ ახალი წიგნების ყიდვაა საჭირო. ეს იმ ფონზე, როცა ნინოწმინდაში სასკოლო სახელმძღვანელოების დეფიციტია.

“როცა გავიგეთ, რომ წიგნები იცვლებოდა, დირექტორს შევჩივლეთ, მან კი ახალი სახელმძღვანელოების ჩამოტანაზე უარი განგვიცხადა. გვითხრა, სადაც გვინდოდა, იქ გვეშოვნა. შეეძლო წიგნები გამომცემლობიდან, შედარებით იაფად ეყიდა, ხელზე ყიდვა ძვირი ჯდება. მაგალითად, 10-ლარიანი წიგნი 17 ლარად უნდა იყიდო. 2-ჯერ შეცვალეს წიგნები და გვერდზე გადგნენ, რაც გინდათ, ის მოახერხეთო. ახლა 5 წიგნი მაქვს შესაძენი~, - ამბობს იგი.

იმავე პრობლემის წინაშე აღმოჩნდა ახჯოიანების ოჯახიც.

`მაგალითად, რუსული ენის წიგნი 7.05დან 10.00 ლარამდე ღირს. გვიწევს ვიყიდოთ, სხვა რა გზაა. ხელფასს 70 ლარს ვიღებთ, წიგნებს შევიძენთ, ბავშვი სადილისთვის ღვეზელს იყიდის და უფულოდ ვრჩებით. წიგნები ერთხელ უკვე ვიყიდეთ, მერე გვითხრეს, რომ არ გამოგვადგება და სხვა სახელმძღვანელოებია საჭირო. დირექტორს თბილისში უთხრეს, რომ ფიზიკისა და ქიმიის სახელმძღვანელოები სომხური სკოლებისთვის არ არის და საჭიროა ქსეროასლების გაკეთება, რაც ასევე ძვირი ჯდება~, - ამბობს მანუშაკ ახჯოიანი.

მარუსია კარსლიანს სამი შვილიშვილი ყავს. იმ სიაში, ვისაც სახელმძღვანელოები საჩუქრად გადაეცა, კარსლიანები არ მოხვდნენ, რადგან ოჯახის უმცროსი წევრი სკოლამდელი ასაკისაა.

`წიგნები რომ მიგვეღო, სამივე ბავშვი სკოლის მოსწავლე უნდა ყოფილიყო. სასწავლო წელი ორი თვის დაწყებულია და სახელმძღვანელოებს მეორედ ვყიდულობთ. ასე შეიძლება?!~, - ამბობს იგი.

კარსლიანების შემოსავალი პენსია და მესაქონლეობით მიღებული თანხაა.

`ეკონომიას გავაკეთებთ, არ შევჭამთ, არ ჩავიცვამთ, მაგრამ სახელმძღვანელოებს აუცილებლად ვიყიდით. შვილიშვილები ფრიადოსნები არიან, როგორ არ ვუყიდოთ წიგნები?!” - გვეუბნება მარუსია კარსლიანი.

ნინოწმინდის საგანმანათლებლო რესურსცენტრში ამბობენ, რომ სახელმძღვანელოების პრობლემა მათ არ ეხებათ. წიგნების ყიდვა მშობლების პრობლემაა და შეუძლიათ თბილისში იყიდონ. დაბნეული მშობლები კი ცდილობენ გაარკვიონ, სად და როგორ შეიძინონ, უკვე მეორედ, სასკოლო წიგნები შეღავათიან ფასად.

[ქრისტინა მარაბიანი, ნინოწმინდა]