არაქართულენოვან სკოლებს რამდენიმე საგნის სახელმძღვანელო ჯერ არ მიუღიათ

ახალციხის მესამე საჯარო სკოლაში, რომელიც სომხურენოვანია, 2013-2014 სასწავლო წლისთვის 623 მოსწავლეა დარეგისტრირებული. მათ შორის 56 პირველკლასელი.

ისევე როგორც ქართულენოვან სკოლებში, სახელმძღვანელოები აქაც ეტაპობრივად რიგდება და წიგნები იმ მოსწავლეებს არ მიუღიათ, ვინც მობილობით სხვა სკოლიდან გადმოვიდნენ.

თუმცა, არაქართულენოვანი სკოლებისთვის ძირითად პრობლემას მშობლიური ენისა და ლიტერატურის წიგნების არქონა წარმოადგენს. მესამე საჯარო სკოლაში ამბობენ, რომ არცერთ მოსწავლეს მშობლიური ენისა და ლიტერატურის წიგნი არ მიუღია. გარდა ამისა, არ მიუღიათ არც რუსული ენის სახელმძღვანელოები.

„მშობლიური ენის წიგნები საერთოდ არ არის, ახლა იმ წიგნებით სწავლობენ, რომელიც სკოლაში გვქონდა, მაგრამ ისინიც მოძველებულია“, - ამბობს მესამე საჯარო სკოლის დირექტორი სვეტა არუთინიანი.

ახალციხის მუნიციპალიტეტის 39 სკოლიდან, სადაც ჯამში 6 205 მოსწავლეა, 14 არაქართულენოვანი სკოლაა. ამ სკოლებში განათლებას 1 625 მოსწავლე ეუფლება.

ახალციხის საგანმანათლებლო რესურსცენტრში ამბობენ, რომ არაქართულენოვანი სკოლების მოსწავლეებისთვის მშობლიური ენისა და ლიტერატურის წიგნები საქართველოში არ იბეჭდება. სომხური ენისა და ლიტერატურის წიგნები სომხეთიდან უნდა შემოვიდეს.

„სამინისტროში არის სომხური დიასპორის განყოფილება, რომლის ხელმძღვანელიც ჩვენ დაგვიკავშირდა, მოგვთხოვა რა რაოდენობის სახელმძღვანელოები სჭირდებათ მოსწავლეებს კლასების მიხედვით, ეს ცხრილები მივაწოდეთ და სახელმძღვანელოებს ველოდებით“, - ამბობს დიანა ინასარიძე.

გარდა, სომხური ენისა და ლიტერატურის სახელმძღვანელოებისა, არაქართულენოვან სკოლებში არც ქართული ენისა და ლიტერატურის წიგნები აქვთ.

„არაქართულენოვანი სკოლებისთვის ქართული ენის სახელმძღვანელოები საქართველოში იბეჭდება, უბრალოდ იყო დაბეჭდილი მერვე დონემდე და ამ ზაფხულს კიდევ დაიბეჭდა, ამაზეც მოთხოვნა გაგზავნილი გვაქვს და უნდა ჩამოვიდეს. უბრალოდ ყველაფერი ერთად ვერ მოვიდა, ამას დრო სჭირდება“, - ამბობს დიანა ინასარიძე.

სახელმძღვანელოებს ელოდებიან ახალქალაქის სკოლებშიც. 16 სექტემბრის მონაცემებით, ქალაქის სკოლებში 639 მოსწავლე ირიცხება. თუმცა ეს არაა საბოლოო ციფრი, რადგან არიან მოსწავლეები, რომლებსაც დაგვიანებული მიმართვის გამო რეგისტრაცია ჯერ არ გაუვლიათ.
ახალაქის საგანმანათლებლო რესურსცენტრშიც ირწმუნებიან, რომ ყველა სკოლაში, სახელმძღვანელოები საჭირო რაოდენობით დარიგდება. სომხური ენისა და ლიტერატურის წიგნებს კი სომხეთის განათლებისა და მეცნიერების სამინისტრო გამოგზავნის და მოსწავლეებს ეს სახელმძღვანელოები უახლოეს მომავალში დაურიგდებათ.

[თამარ თოთაძე, აღუნიკ აივაზიანი, ახალციხე]