ბორჯომთან ავტომანქანა მდინარე მტკვარში გადავარდა

შემთხვევა დღეს, 9 ივნისს, საღამოს მოხდა. TOYOTA-ს მარკის ავტომობილში მხოლოდ მისი მძღოლი იმყოფებოდა. იგი მდინარიდან სამაშველო სამსახურმა ამოიყვანა. დაშავებული სასწრაფო–სამედიცინო დახმარების სამსახურმა ბორჯომის საავადმყოფოში გადაიყვანა.

როგორც საავადმყოფოში „სამხრეთის კარიბჭეს“ განუცხადეს, ახალგაზრდა ქალბატონის ჯანმრთელობის მდგომარეობა დამაკმაყოფილებელია: „მოტეხილობები არ აქვს, მის სიცოცხლეს საფრთხე არ ემუქრება“.

საქართველოს შინაგან საქმეთა სამინისტროს საზოგადოებასთან ურთიერთობის სამსახურის ინფორმაციით, მომხდარზე ძიება სისხლის სამართლის კოდექსის 276–ე მუხლის 1–ლი ნაწილით დაიწყო. ეს მუხლი ითვალისწინებს ტრანსპორტის მოძრაობის უსაფრთხოების წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

[sknews.ge]