ახალციხეში ავტოსაგზაო შემთხვევის შედეგად მოპედის მძღოლი დაშავდა [Photo]

შემთხვევა დაახლოებით 21:40 საათზე მოხდა. თვითმხილველების თქმით, 9 აპრილის ქუჩიდან მომავალმა მოპედმა შუქნიშანზე ვეღარ გამოასწრო და Land Rover–ის მარკის ავტომობილს შეეჯახა, რომელიც ამ დროს 9 აპრილის მიმართულებით უხვევდა.

შემთხვევის შედეგად მოპედის მძღოლი, 1995 წელს დაბადებული ახალგაზრდა დაშავდა. სასწრაფო სამედიცინო დახმარების ჯგუფმა იგი ახალციხის რეფერალურ ჰოსპიტალში გადაიყვანა.

სამედიცინო დაწესებულებაში „სამხრეთის კარიბჭეს“ განუცხადეს, რომ დაშავებულს აქვს პოლიტრამვები და ღია მოტეხილობები: „მისი მდგომარეობა სტაბილურია, ამ წუთებში საოპერაციოდ ამზადებენ“.

საქართველოს შინაგან საქმეთა სამინისტროს ცნობით, მომხდარზე ძიება სსკ–ის 276-ე მუხლის პირველი ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.





[sknews.ge]