ავარიის შედეგად დაშავებული მოპედის მძღოლი საავადმყოფოში რჩება

ახალციხის რეფერალური ჰოსპიტალის ინფორმაციით, მოპედის მძღოლი 18 წლისაა. მას ავარიის შედეგად შინაგანი ორგანოების დაზიანება არ მიუღია, თუმცა ჭრილობები აქვს სახის არეში და ცხვირის მოტეხილობა აღენიშნება.

"სახის არეში ქირურგიული ჭრილობები ჰქონდა. ეს ჭრილობები დამუშავებულია. ასევე აქვს ცხვირის მოტეხილობაც, მაგრამ ეს შემდგომი ეტაპის საქმეა. სხვა დანარჩენი სტაბლური მდგომარეობაა", – ამბობს ახალციხის რეფერალური ჰოსპიტალის დირექტორი ხათუნა კეკელაშვილი.

მისივე თქმით, პაციენტი ჯერ–ჯერობით საავადმყოფოში რჩება და იგი დაკვირვების ქვეშ იმყოფება.

შეგახსენებთ, რომ ავარია გუშინ, 5 ოქტომბერს, ქალაქ ახალციხეში თამარაშვილის ქუჩაზე მოხდა. მოპედი "ოპელის" მარკის ავტომობილს შეეჯახა. შემთხვევის შედეგად, მხოლოდ მოპედის მძღოლი დაზიანდა.

მომხდარზე ძიება სსკ–ის 276-ე მუხლის პირველი ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

[თაკო ფეიქრიშვილი, ახალციხე]