მუზეუმის სამეცნიერო ფონდისთვის ერთი წელია თაროებს ამზადებენ

სამცხე–ჯავახეთის უნივერსიტეტის მეორე კორპუსიდან სამცხე–ჯავახეთის მუზეუმის სამეცნიერო ფონდი, სამი წლის შემდეგ, „ახალციხის ციხეზე, „პუმას“ ყოფილი მაღაზიის შენობაში გადაიტანეს. აქ ამ დროისთვის ნაბეჭდი ფორმით სულ 16 492 ეგზემპლარია განთავსებული, აქედან 11 600 ქართულია, 4 832 კი უცხოური ; რაც შეეხება საერთო წიგნად ფონდს, მისი ოდენობა 11 516 ერთეულია.

„ფონდი გადმოვიტანეთ, თუმცა ჯერ თაროები, რომლებზეც უნდა განვათავსოთ, არ ჩამოგვსვლია. იქ სიგნალიზაციია გაკეთებული, სათანადოდაა დაცული და ჩვენი თანამშრომლის გარდა, სხვას შესვლის უფლება არ აქვს“, – ამბობს სამცხე–ჯავახეთის ისტორიის რეგიონული მუზეუმის მენეჯერი ციური ლაფაჩი.

შესაბამის თაროებს მუზეუმში ერთი წელია ელოდებიან. შეკითხვაზე, რატომ ვერ მოხერხდა ამ ხნის განმვლობაში მათი დამზადება, ლაფაჩი გვპასუხობს: „სახელმწიფოს არ აქვს იმდენი საშუალება, რომ რასაც ვითხოვთ სხვადასხვა რეგიონებიდან ყველა, მაშინვე დააკმაყოფილოს. რეორგანიზაცია ყველგან მოხდა და ბუნებრივია ყველაფერს ვერ დააფინანსებენ. მაგრამ ამ შემთხვევაში მიზეზი ეს არ არის. თაროებზე მოთხოვნა გაგზავნილია საზღვარგარეთ და როგორც კი ქარხანაში ჩვენი რიგი დადგება, დაამზადებენ და გამოგზავნიან“.

სამეცნიერო ფონდისგან განსხვავებით, მუზეუმის ისტორიული და ეთნოგრაფიული ექსპონატები ჯერ ისევ უნივერსიტეტის მეორე კორპუსში რჩება.

შეგახსენებთ, რომ სამცხე–ჯავახეთის მუზეუმის ექსპონატები და სამეცნიერო ბიბლიოთეკა სამცხე–ჯავახეთის უნივერსიტეტის მეორე კორპუსის სარდაფში 2012 წლის აგვისტოში ჩაიტანეს, მას შემდეგ, რაც რაბათში სარეაბილიტაციო სამუშაოები დაიწყო. ახალციხის ციხის რეაბილიტაციის დასრულების შემდეგ, ექსპონატების ნაწილი განახლებულ მუზეუმში აიტანეს და ვიტრინებში განათავსეს. ნაწილი კი ისევ სარდაფში დარჩა. იქ არსებული ფონდის ციხის ტერიტორიაზე განსათავსებლად „პუმას“ ყოფილი მაღაზია 2013 წელს გამოიყო. როდემდე შეიძლება იყო ექსპონატების ნაწილი სარდაფში, ჯერ უცნობია.

[თამუნა უჩიძე, ახალციხე]