სარდაფში გამოკეტილ მუზეუმის ფონდს ახალციხის ციხეზე გადაიტანენ

ფართი, სადაც ფონდს გადაიტანენ. ფოტო "სამხრეთის კარიბჭეს" არქივიდან

სამცხე–ჯავახეთის ისტორიის ეროვნული მუზეუმის მენეჯერის, ციური ლაფაჩის განმარტებით, გასულ კვირას ახალციხეში საქართველოს ეროვნული ბიბლიოთეკის წარმომადგენლები იმყოფებოდნენ და ის ადგილი დაათვალიერეს, სადაც სამეცნიერო ბიბლიოთეკას და მუზეუმის ექსპონატებს განათავსებენ.

„იყო ჩამოსული კომისია, კეთდება პროექტი, რომლის მიხედვითაც გაირკვევა რამდენი ვიტრინაა საჭირო, სადგარები, კარადები და ა. შ. ყველაფერს გააკეთებენ იმისთვის, რომ წიგნები და ექსპონატები დავალაგოთ ვიტრინებში, მანამდე სანამ არ გვექნება შესაბამისი ფონდების შენობა“, – ამბობს ციური ლაფაჩი.

შეგახსენებთ, რომ სამცხე–ჯავახეთის მუზეუმის ექსპონატები და სამეცნიერო ბიბლიოთეკა სამცხე–ჯავახეთის უნივერსიტეტის მეორე კორპუსის სარდაფში 2012 წლის აგვისტოში ჩაიტანეს, მას შემდეგ, რაც რაბათში სარეაბილიტაციო სამუშაოები დაიწყო.

ახალციხი ციხის რეაბილიტაციის დასრულების შემდეგ, ექსპონატების ნაწილი განახლებულ მუზეუმში აიტანეს და ვიტრინებში განათავსეს. ნაწილი კი ისევ სარდაფში დარჩა.

[თინათინ ზაზაძე, ახალციხე]