ვარხანში მცხოვრები მსხვილიძეები გამგეობის დახმარებას ელიან

სულხან მსხვილიძემ, რომელსაც წყალდიდობამ სახლი დაუზიანა, ჩამოშლილი კედელი უკვე ამოაშენა. 29 მაისს მის ეზოსა და სახლში შევარდნილმა წყალმა ჯერ ძირი გამოაცალა სახლის ნაწილს, შემდეგ კი კედელი გადმოანგრია.

„ეზოში ორი მანქანა ხრეში, 10 „პაჩკა“ ცემენტი და 24 ცალი გიბსოკარდონი მქონდა, სახლის შეკეთებას ვაპირებდი, ისიც სულ წყალმა წაიღო“, – ამბობს მსხვილიძე.

მისი თქმით, სახლში დაგუბებული წყალი მაშველებმა ამოტუმბეს. სამშენებლო მასალებიდან კი ვერაფერი გადაარჩინა: „ისევ თავიდან ვიყიდე ყველაფერი და მონგრეული ნაწილიც ამოვაშენე. დიდი ზარალი ვნახე, მპირდებიან თვითმმართველობიდან დაგეხმარებითო და ველოდები“.

ადიგენის მუნიციპალიტეტის გამგეობაში 29 მაისს სტიქიისგან მიყენებულ ზარალს შესაბამისი კომისია ამ დრომდე ითვლის. როგორც გამგებლის მოადგილე არსენ ბალახაშვილი ამბობს, ვიდრე ზარალს არ დაითვლიან, შეუძლებელია განსაზღვრონ ვის რითი დაეხმარებიან: „არ ვიცით მსხვილიძეს დავეხმარებით თუ არა“.

შეგახსენებთ, 29 მაისს, ძლიერმა წვიმამ დააზარალა ადიგენის სოფლები: აბასთუმანი, ვარხანი, უნწა, ქიქინეთი, წახანი და ბენარა.
შედარებით ნაკლებად, თუმცა, წვიმამ დააზარალა არალი და უდეც. ადიდებულმა მდინარე ოცხემ და ღელეებმა,დატბორა გზები, სახნავ–სათესი ფართობები და საცხოვრებელი სახლები. სტიქიის შედეგად არავინ დაშავებულა.



[თამუნა უჩიძე, ადიგენი]