სახურავგადახდილ კორპუსში დახმარებას ითხოვენ

23 მაისს, ძლიერი ქარისგან გადახდილი სახურავის გამო, ადგილობრივების ბინების უმეტესობაში წვიმის წყალი არ ჩასულა, თუმცა, ჩაირეცხა სადარბაზოები. ახალციხეში დღესაც მთელი დღე წვიმდა. რვასართულიანის მცოხვრებლები ამბობენ, რომ ასეთი ამინდები თუ გაგრძელდა, მალე სახურავი წყლით გაიჟღინთება და წვიმა სახლებში ჩაუვათ. ისინი დახმარებას ადგილობრივი ხელისუფლებისგან ელოდებიან.

"ვვარაუდობთ, რომ ერთ მეზობელთან ჩავიდოდა წყალი, მაგრამ ის ახლა საქრთველოში არ იმყოფება და ვერ გავიგებთ. თუმცა, თუ სახურავს მალე არ გადახურავენ, წვიმა ნამდვილად ჩამოვა“, – ამბობს თამარაშვილის N2–ში, რვასართულიან კორპუსში მცხოვრები ალექსანდრე პეტრიაშვილი.

მისი თქმით, სტიქიის შედეგად მათ ბინაში მხოლოდ სადარბაზოები დაზიანდა: "საკვამურებს ჩამოყვა წყალი და თითმის ყველა სადარბაზოს კედელი ჩამორეცხა“.

გარდა აღნიშნულისა, ქარისგან გადავარდნილმა სახურავმა რვასართულიანი ბინის ეზოში 5 მანქანა დააზიანა.

„ავტოფარეხთან მეყენა მანქანა. წინა მინა მთლიანად ჩამტვრულია, ალბათ ადგილობრივ ხელისუფლებას მოვთხოვთ დახმარებას“, – ამბობს რვასართულიან კორპუსში მცხოვრები ნინო კაპანაძე.

კუთვნილი ავტომობილი დაუზიანდა ამავე კორპუსში მცხოვრებ ჯონი კახნიაშვილსაც: "ეს განგებ არავის გაუკეთებია, სტიქია იყო, მაგრამ მთავრობა უნდა დაგვეხმაროს“, – ამბობს და ამატებს: "თქვენ რომ იყოთ, არ მოითხოვთ ზიანის ანაზღაურებას?“

გადმოვარდნილმა სახურავმა ავტომობილი დაუზიანა რომან თათოშვილსაც, რომელმაც თამარაშვილის ქუჩაზე მანქანა დროებით გააჩერა: "შვილი იყო ინგლისურის მასწავლებელთან მისული, რომ გამოვიდა ასეთი მდგომარეობა დახვდა“.

რა ბედი ელით დაზარალებულებს, ამ ეტაპზე უცნობია. სტიქიის შდეგებს მერიაში შექმნილი კომისია სწავლობს. ჯერ ზარალი ბოლომდე დათვლილი არ არის.

შეგახსენებთ, გუშინ, 23 მაისს, საღამოს, ქარმა ახალციხეში მრავალსართულიან საცხოვრებელ კორპუსს სახურავი გადახადა. შემთხვევას მსხვერპლი არ მოჰყოლია. ადგილზე მობილიზებული იყო სახანძრო სამაშველო სამსახური და საპარტულო პოლიცია. შემთხვევის ადგილზე იმყოფებოდნენ ადგილობრივი ხელისუფლების წარმომადგენლები.



[თინათინ ზაზაძე, ახალციხე]