მოსახლეობა პოლიკლინიკის აღდგენას ითხოვს

ხელმოწერებს ნინო ჩოგოვაძეც აგროვებდა. ამბობს, რომ პატარა ბავშვით საავადმყოფოში ასვლა უჭირს და ამიტომ, ხელმოწერების შეგროვება საკუთარი სურვილითა და მოსახლეობის ინტერესების გათვალისწინებით გადაწყვიტა.

”ხელმოწერებს როცა ვაგროვებდი, განაცხადში ასე ეწერა, რომ პოლიკლინიკის ზემოთ გადატანის გამო მოსახლეობას იქ ასვლა უჭირს, ხალხი კი ამბობდა, რომ ეს ცოტაა, ჩვენ დავამატებთ როგორ გვიჭირსო, თავიანთ აზრს გამოთქვამდნენ. ამიტომ, ეს, პირველ რიგში, მოსახლეობის იდეაა“, - ამბობს ჩოგოვაძე და ამატებს, რომ განსაკუთრებით მძიმე მდგომარეობაში ხანდაზმულებინ აღმოჩნდნენ. საავადმყოფოში ტაქსით ასვლა ყველას არ შეუძლია, საქალაქო ტრანსპორტი კი მოსახერხებელი არაა. ამასთანავე, მათ რიგში უწევთ დგომა და დამაბნეველია სად რა განყოფილებაა.

”სამოცდაათი წლის მოხუცი ვარ, ყოველ დღე პოლიკლინიკაში ვიყავი. მარტო მე კი არა, სახლში ბავშვი გვყავს და ექიმი სულ გვჭირდება. ყოველ კვირას მიწევს ამოსვლა საავადმყოფოში, ხან ”საქალაქოთი” დავდივარ და ხან კიდევ, როცა მეჩქარება და ცუდად ვარ, ტაქსით, სხვა გზა არ მაქვს”, - ამბობს ლუიზა ზედგინიძე.

მოსახლეობა ითხოვს, რომ პოლიკლინიკა საავადმყოფოს ისევ ცალკე გამოეყოს და ქალაქის ცენტრში განთავსდეს.

„მართალია ეს ხალხი მოთხოვნა იყო, მაგრამ ვინმემ ხომ უნდა გაუკეთოს ორგანიზება?! ადგილობრივების თხოვნით ლილი კაკოშვილს დაველაპარაკეთ, მასაც მოეწონა ეს აზრი და ორგანიზება გაუკეთა“, - ამბობს ნინო ჩოგოვაძე.

ლილი კაკოშვილი წლების განმავლობაში ახალციხის რაიონულ პოლიკლინიკას ხელმძღვანელობდა. „სამხრეთის კარიბჭესთან“ კომენტარის გაკეთებას მოერიდა, იმის გამო, რომ საავადმყოფოს ადმინისტრაციისგან აკრძალული აქვს. თუმცა, პირად საუბარში აღნიშნა, რომ ხელმოწერების შესახებ ინფორმაცია ჰქონდა.

მოსახლეობის თქმით, ხელმოწერები ჯანდაცვის სამინისტროში გაიგზავნა. აღნიშნული საკითხით ჯანდაცვის სამინისტროს ”სამხრეთის კარიბჭემ” ერთი თვის წინ მიმართა, თუმცა ამ დრომდე პასუხი არ მიგვიღია.

საავადმყოფოს ადმინისტრაციაში განმარტავენ, რომ პოლიკლინიკის ცალკე გამოყოფასა და ქალაქის ცენტრში გადმოტანაზე კომენტარს ვერ გააკეთებენ: ”ამაზე ჩვენ ვერ გიპასუხებთ, ეს ჯანდაცვის სამინისტროს უნდა ჰკითხოთ“.

„უნიმედი სამცხე“ ახალციხის სამედიცინო დაწესებულების მენეჯერი დავით მაისურაძე ამბობს, რომ მოსახლეობის ინიციატივის შესახებ სმენია, თუმცა რამდენად რეალურია. რომ პოლიკლინიკა საავადმყოფოს გამოეყოს, ეს მის კომპეტენციას ცდება: ”მეც თქვენსავით გავიგე, რომ პოლიკლინიკის დაბრუნებასთან დაკავშირებით ხელმოწერები გროვდებოდა. სხვა არაფერი ვიცი“.

მოსახლეობამ იდეა ახალციხის მუნიციპალიტეტის გამგებლის მოვალეობის შემსრულებელსაც გააცნო. ”უნიმედი-სამცხედან” გათავისუფლებულ ექიმებთან შეხვედრის შემდეგ ბესიკ ხითარიშვილმა განმარტა, რომ პირველ ეტაპზე გასარკვევია მართლა გაუქმდა თუ არა პროგრამა, რომლის ფარგლებშიც ეს ადამიანები მუშაობდნენ. საუბარია სახელმწიფო პროგრამაზე, რომელიც 0-დან 6 წლამდე ბავშვებისა და 60-წელს ზემოთ ასაკის ადამიანების მომსახურებას ითვალისწინებდა.

”გვაქვს რაღაც სამომავლო გეგმები იმასთან დაკავშირებით, რომ ისევ ქალაქის ცენტრალურ ტერიტორიაზე მოვძებნოთ ალტერნატიული ფართი, სადაც განთავსდება ახალციხის პოლიკლინიკა”, - განმარტავს ბესიკ ხითარიშვილი.
მისივე თქმით, ადგილობრივი ხელისუფლება შეეცდება გაარკვიოს მოქმედებს თუ არა ისევ აღნიშნული პროგრამა.

”თუ ეს პროგრამა მოქმედებს, შესაბამისად ალბათ ეს ხალხიც დასაქმდება. ჯერ გადაჭრით ვერაფერს ვამბობ. მაგრამ ის, რომ პოლიკლინიკის შენობა გადმოვიდეს ქალაქის ტერიტორიაზე, გეგმაში გვაქვს და ამ საკითხზე კონსულტაციები მიმდინარეობს”, - განაცხადა ხითარიშვილმა.

[თამარ თოთაძე, ახალციხე]